हेल्थ टुडे
मिर्गौला उपचारका लागि त्रिवि शिक्षण अस्पतालमा आउने विरामीलाई विभिन्न बहानामा निजी क्षेत्रको सबैभन्दा महंगो ग्राण्डि अन्तर्राष्ट्रिय अस्पतालमा लगेर पैसा असुल्ने गरेको आरोप लागेका सरकारी अस्पतालका डाक्टरहरुको नेतृत्वमा निजी क्षेत्रमा पहिलो पटक ग्राण्डीमा मिर्गौला प्रत्यारोपण सुरु भएको छ ।
सरकारी अस्पतालमा कार्यरत चिकित्सकले निजीमा प्रत्यारोपण गर्दा सरकारीका विरामी निजीमा लगेर मोटो रकम असुल्ने परिपाटी रोक्न सरकारले सरकारी अस्पताल बाहेक अहिलेसम्म निजी अस्पताललाई मिर्गौला प्रत्यारोपण गर्ने अनुमती दिन मानेको थिएन । ग्राण्डीले केही दिन पहिले बिभिन्न प्रलोभनमा पारेर स्वास्थ्य मन्त्रालयबाट प्रत्यारोपणको अनुमती लिएको मन्त्रालयका अधिकारीले बताएकाछन् । त्रिवि शिक्षण अस्पतालमा कार्यरत मिर्गौला प्रत्यारोपणविज्ञ डा.प्रेम ज्ञवाली र नेफ्रोलोजिस्ट डा.दिव्यासिहको नेतृत्वमा ग्राण्डीमा मिर्गौला प्रत्यारोपण सुरु भएको हो ।
त्रिवि शिक्षण अस्पतालमा कार्यरत यी दुबै चिकित्सक ग्राण्डी अस्पताल स्थापनादेखि नै त्यहाँ कार्यरत छन् । यही असार २७ गतेदेखि ग्राण्डीले मिर्गौला प्रत्यारोपण सेवा सुरु गरिएको अस्पतालका कार्यकारी निर्देशक डा.चक्रराज पाण्डेले शुक्रबार पत्रकार सम्मेलनमा जानकारी दिएका छन् । अस्पतालले पहिलो पटक काठमाडौंका रविन लामाको मिर्गौला प्रत्यारोपण गरेको उनले बताए ।
नेपालमा अहिलेसम्म सरकारी अस्पतालहरु त्रिवि शिक्षण अस्पताल, बीर अस्पताल र भक्तपुर स्थित मानव अंग प्रत्यारोपण केन्द्रमा मात्र मिर्गौला प्रत्यारोपण सेवा उपलब्ध थियो । तिन वटै सरकारी अस्पतालहरुमा गरि करिव साडे ५ सयको मिर्गौला प्रत्यारोपण भएको छ ।
Leave a Reply