३० हजार कोरोना पीसीआर परीक्षण किट आईपुग्यो

हेल्थ टुडे,
काठमाडौं, २५ बैसाख : स्विटजरल्याण्ड सरकारले सहयोग स्वरुप उपलब्ध गराएको ३० हजार किट बिहीबार साझ नेपाल आईपुगेको छ । यो किटको अभावमा पीसीआर विधिबाट हुने कोरोना भाइरसको नमुना परीक्षण रोकिने अवस्था आएको थियो । किट अभावकै कारण सुदूरपश्चिम प्रदेश, वीर अस्पताल, चितवन सहितका थुप्रै ठाउमा परीक्षण रोकिएको थियो भने सञ्चालन भएको ठाउँमा समेत गत एक हप्तादेखि न्यून मात्रामा मात्र परीक्षण भइरहेको थियो । स्वास्थ्य तथा जनसंख्या मन्त्री भानुभक्त ढकाल र स्वासथ्यका अधिकारीहरुलाई बिहीबार साझ त्रिभुवन विमानस्थलमा स्विस राजदूतले उक्त ३० हजार किट प्रदान गरेकी छन् । बिपतको बेला सहयोग गरेकोमा स्विस सरकारले ठूलो गुन लगाएको स्वास्थ्य मन्त्रालयका प्रमुख विशेषज्ञ डा. रोषन पोखरेलले बताए । किट अभावका कारण रोकिएको पीसीआर विधिबाट हुने नमुना परीक्षणले भोलीबाट गति लिने डा. पोखरेलले बताए । अहिले देशका १६ स्थानबाट पीसीआर बिधिबाट कोरोनाको नमुना परीक्षण भइरहेको छ । नेपालमा अहिलेसम्म १०१ जनामा कोरोना संक्रमण देखिएको छ ।