विषाक्त मदिरा सेवनबाट एक सय जनाभन्दा बढीको मृत्यु,करिब २०० जना अस्पताल भर्ना

आसाम,१२ फागुन । भारतको पूर्वी–उत्तर राज्य आसाममा विषाक्त मदिरा सेवन गर्दा मृत्यु हुनेको सङ्ख्या १०० भन्दा बढी पुगेको त्यहाँका अधिकारीहरुले जनाएका छन् । दुई सयभन्दा बढी व्यक्तिलाई उपचारका लागि एउटा अस्पतालमा भर्ना गरिएको छ । विरामीमध्ये महिलाहरू पनि छन् । उनीहरू सबै आसामको चिया बगानमा काम गर्ने मजदुर रहेको जनाइएको छ ।

स्थानीय अधिकारीहरुका अनुसार अस्पतालमा उपचाररत केहीको अवस्था चिन्ताजनक भएकाले मृत्यु हुनेहरूको सङ्ख्या बढ्न सक्नेछ । दुई हप्ताअघि अरू दुई राज्य उत्तर प्रदेश र उत्तराखण्डमा पनि विषाक्त मदिराका कारण झण्डै एक सय जनाको मृत्यु भएको थियो । आसामको गोलाघाट र जोरहाट जिल्लामा भएका बगानमा काम गर्ने मजदुरहरुले विषाक्त मदिरा सेवन गरेका हुन् । गोलाघाट जिल्लामा मात्रै ५८ जनाको मृत्यु भएको प्रहरीले जनाएको छ । १२ जनाको मृत्यु जोरहाट जिल्लामा भएको छ ।

बिरामीको उपचारमा संलग्न चिकित्सकका अनुसार बिरामी बान्ता गर्दै र छाती दुख्ने एवम् सास फेर्न गाह्रो हुने गम्भीर समस्यासहित अस्पताल पुगेका थिए । राज्य प्रहरीले एक जनालाई अवैध मदिरा बेचेको आरोपमा पक्राउ गरिएको छ । राज्य सरकारले विषाक्त मदिरा बिक्रीवितरण रोक्न नसकेको भन्दै दुईजना अधिकारीहरूलाई निलम्बन गरेको छ ।