नेपाल मेडिकल काउन्सिलद्वारा ‘सीपीडी’ लागु, लाइसेन्स नवीकरण गर्न एक सय अङ्क ल्याउनै पर्ने

हेल्थ टुडे,
काठमाडौ,२१ जेठः नेपाल मेडिकल काउन्सिलले ‘निरन्तर पेशागत उन्नयन कार्यक्रम (सीपीडी)’ लागु गरेको छ । काउन्सिलले जारी गरेको सीपीडी अनुसार अबदेखि चिकित्सकको अनुमतिपत्र (लाइसेन्स) नवीकरण गर्न पाँच वर्षभित्र एकसय अङ्क ल्याउनै पर्ने भएको छ । सीपीडी अनुसार पाँच वर्षभित्र चिकित्सकले एकसय अङ्क ल्याउन नसके चिकित्सकको लाइसेन्स नवीकरण हुने छैन् । सीपीडी लागू भएसंगै लाइसेन्स नवीकरणका लागि चिकित्सकले पाँच वर्ष भित्र एक सय अङ्क ल्याउनै पर्ने बाध्यता भएको छ ।

नेपाल मेडिकल काउन्सिलका अध्यक्ष डा.धर्मकान्त बाँस्कोटाले नेपालमा चिकित्सा सेवा दिएका सम्पूर्ण चिकित्सकको ज्ञान र सीपलाई अझ परिष्कृत गर्न यस्तो ब्यबस्था ल्याइएको जानकारी दिए । उनले चिकित्सक र उपचाररत बिरामीबीच उत्पन्न हुने असमझदारीलाई न्यूनीकरण गर्न सिपिडीले मद्धत गर्ने भन्दै अस्वाभाविक रूपमा लेखिने औषधि तथा परीक्षणलाई व्यवस्थित गर्न सकिने विश्वास व्यक्त गरे ।

नेपाल मेडिकल काउन्सिलले कन्टिन्युइङ प्रोफेसनल डिभलप्मेन्ट (सीपीडी) लागू गरेसँगै डाक्टरले पाँच वर्षभित्रमा एक सय अङ्क ल्याउनुपर्छ । जस अन्र्तगत ३० अङ्क तोकिएको अनिवार्य विषयमा ल्याउनुपर्ने छ भने बाँकी ७० अङ्क आफ्नो व्यावसायिक रुचिको क्षेत्रबाटै आर्जन गर्न सकिनेछ । व्यावसायिक रुचि अनुसारको क्षेत्र भन्नाले रुचि अनुसारको क्षेत्रमा शैक्षिक योग्यता, तालिम, प्रकाशित गरेको लेख, रचना, सम्मेलन, सेमिनार, लगायतका आधारमा ७० अङ्क आर्जन गर्नुपर्नेछ ।

चिकित्सकको काउन्सिलले सिर्जना गरेको सफ्टवेयर प्रणालीमा रेकर्ड बन्दै जाने र त्यही आधारमा अनिवार्य विषयमा ३० र अन्य विषयबाट ७० अङ्क ल्याए पछि मात्र सिपिडी पास मानिने छ । काउन्सिलको यो व्यवस्थाले चिकित्सकलाई राष्ट्रिय र अन्तर्राष्ट्रिय रुपमा रूपमा अब्बल साबित गर्ने विश्वास लिइएको छ ।

अनिवार्य मानिएका आचारसंहिता, सञ्चार सीप,संक्रमण रोकथाम र नियन्त्रण, औषधिको सही प्रयोगसँगै व्यावसायिक क्षेत्रमा शैक्षिक योग्यता, तालिम, प्रकाशित गरेका लेखरचना, पुस्तक, सभा–सम्मेलन तथा कार्यशालामा सहभागिता समेत चिकित्सकलाई अङ्क प्रदान गरिनेछ ।
त्यसका लागि चिकित्सकले सुरुमा काउन्सिल वेभसाइटमा सीपीडी कार्यक्रममा लगइन गरेर आफूलाई दर्ता गर्ने र आफ्ना कार्यक्रमहरूलाई दर्ता गर्दै मूल्याङ्कन राख्दै जानुपर्नेछ ।

नेपालमा चिकित्सा व्यवसायको उन्नति गरी स्वास्थ्य सेवाको गुणस्तर सुधारका लागि सीपीडी लागू गरिएको काउन्सिलले जनाएको छ । सीपीडी कार्यक्रमले बिरामी र डाक्टरबीचको दूरी नजिक बन्ने र कार्यक्रमको कार्यान्वयनले चिकित्सकलाई निरन्तर अद्यावधिक रहन मद्दत गर्ने काउन्सिलको विश्वास छ ।