पाठेघरको मुखको क्यान्सरको लक्षण र बच्ने उपाय

हेल्थ टुडे,
काठमाडौ,जेठः पछिल्लो समय नेपाली महिलाहरुमा पाठेघरको मुखको क्यान्सर बढिरहेको विभिन्न तथ्याङ्ले देखाएको छ । शहरमा बस्ने भन्दा ग्रामीण भेगमा बस्ने महिलाहरुमा यो समस्या बढीरहेको चिकित्सकहरुले बताएका छन् । नेपालमा महिलामा बढी देखिने पहिलो क्यान्सरमा पाठेघरको मुखको क्यान्सर बढी देखिएको छ । विशेषगरी ४० वर्ष नाघेपछि देखिने गरेको पाठेघरको मुखको क्यान्सर पछिल्लो समय कम उमेरमा पनि देखिन थालेको छ ।

यो रोगबाट बच्न कम उमेरमा विवाह नगर्ने, गुप्तांगको सरसफाईमा विशेष ध्यान दिन, धेरै बच्चा नजन्माउन, सूर्तीजन्य पदार्थको सेवन नगर्ने र हरेक एक वर्षमा पाठेघरको (प्याप–स्मेयर) परीक्षण गराएमा यो रोगबाट बच्न सकिने चिकित्सकको सुझाव छ । तर धेरै पाठेघरको मुखको क्यान्सरका बिरामीहरु अन्तिम अवस्थामा मात्र अस्पताल उपचारका लागि आउने गरेका छन् ।

ह्युमन प्यापिलोमा भाइरसका कारण महिलामा क्यान्सर लाग्ने गरेको चिकित्सकहरु बताउँछन् । त्यसैगरी अमेरिकन क्यान्सर सोसाइटीका अनुसार सबै महिलाको स्क्रिनिङ २१ वर्षको उमेरमा सुरू गर्नुपर्ने हुन्छ । एचआईभी संक्रमण भएका अंग प्रत्यारोपण गरेका, शरीरको रोगसँग लड्ने क्षमता कम भएको स्थितिमा यस्ता स्क्रिनिङ अलि छिटो अर्थात् धेरै गर्नुपर्ने सोसाईटीले जनाएको छ । नेपाल सरकारसँग पाठेघरको मुखको क्यान्सरका कति बिरामी छन् भन्‍ने यकिन तथ्यांक समेत छैन् । विश्व स्वास्थ्य संगठनका अनुसार कम आय भएका देशहरुमा पाठेघरको मुखको क्यान्सर बढी देखिने गरेको छ ।
पाठेघरको मुखको क्यान्सरका लक्षणहरु…
१.महिनावारी भइसकेपछि पनि पुन रक्तश्राव हुने
२.तल्लो पेट दुख्ने
३.यौनसम्पर्कको समयमा बढी पीडा हुने
४.तौल अस्वाभाविक रूपमा घट्ने वा बढ्ने
५.पेट सुन्निने तथा हावा भरिएजस्तो हुने
६.पिसाब गर्न पीडा र गाह्रो अनुभव हुने आदि
कसरी बच्ने त ?
१.कम उमेरमा विवाह नगर्ने
२.गुप्तांगसम्बन्धी रोगहरूको समयमै उपचार गराउने
३.हरेक एक वर्षमा पाठेघरको (प्याप–स्मेयर) परीक्षण गराउने
४.एकभन्दा बढी व्यक्तिहरूसँग यौनसम्पर्क नगर्ने
५.धेरै बच्चा नजन्माउने
६.गुप्तांगको सरसफाईमा विशेष ध्यान दिने
७.सूर्तीजन्य पदार्थको सेवन नगर्ने ।