कसलाई हुन्छ पाठेघरको मुखको क्यान्सर

डा. सरिता घिमिरे

बच्चा जन्माउन सक्षम महिलालाई पाठेघरको मुखको क्यान्सर बढी लाग्ने संभावना हुन्छ । विशेषगरी ३० वर्ष देखि ५० वर्ष उमेरका महिला जसको बिहेवारी भइसकेको छ अथवा शारीरिक सम्पर्क भइसकेका महिलामा पाठेघरको मुखको क्यान्सर हुने सम्भावना बढी हुन्छ । त्यसैगरि धेरै बच्चा भएका, सानो उमेरमा विवाह भएका महिलालाई यो रोग लाग्ने सम्भावना रहन्छ । यसका साथै यौन व्यवसायमा लागेका महिला अथवा परपुरुषको संसर्गमा रहेका महिलामा पनि यो रोग लाग्ने प्रबल सम्भावना हुन्छ । पतिको अर्की श्रीमतीलाई यो रोग भएको छ भने पनि आफूलाई हुने सम्भावना बढी हुन्छ ।

अनि जाँड रक्सी, चुरोट, खैनी, बिडी, तमाखु इत्यादि सेवन गर्ने तथा खानपिनमा ध्यान नदिने तथा कुपोषण भएका महिलालाई पनि यो रोग लाग्ने खतरा बढी हुन्छ । . हर्मोन लिने महिलाहरूमा खतरा केही बढी मात्रामा हुने सम्भावना रहन्छ ।

पाठेघरको मुखको क्यान्सर भनेको उक्त अंगमा अनियन्त्रित कोषिकाहरूको वृद्धि हो । जुन साधारण उपचारले फेरि फर्कन सक्दछ । यो यही कारणले हो भनेर किटान नभए पनि एक प्रकारको भाइरल संक्रमण यसको मुख्य कारक तत्वको रूपमा देखा परेको छ । ‘ह्युमन पापिलोमा’ नामको कीटाणुका केही प्रजाति यसको प्रमुख कारक हुन् । त्यस्तै गरी शारीरिक सरसफाइमा ध्यान नदिनाले, धेरैजनासँग शारीरिक सम्पर्क गर्नाले पनि यो रोग लाग्न सक्छ । यस कीटाणुले पाठेघरको मुखमा रहेका कोषिकाहरूमा संक्रमण गर्दछ र त्यसलाई अनियन्त्रित तवरले बढन मद्दत पु¥याउँदछ ।

यो रोग लागे नलागेको पत्ता लगाउन समयसमयमा डाक्टरसँग जाँच गराउनु अत्यन्तै आवश्यक छ । साथै समयसमयमा प्याप स्मेयर जाँच गराएर पनि यो रोग लाग्ने सम्भावना कति भन्ने कुरा पत्ता लगाउन सकिन्छ । प्याप स्मेयर जाँच पाठेघरको पानी झिकेर जाँच गरी क्यान्सर भएको छ कि छैन र क्यान्सर हुने सम्भावना छ कि छैन भनी पत्ता लगाउने एक विशेष किसिमको अत्यन्तै सरल जाँच हो ।  साधारण डाक्टरसित जचाउँदा यदि क्यान्सरको शंका गरेको भए तुरुन्त गई क्यान्सर विशेषज्ञसँग परामर्श लिन आवश्यक हुन्छ ।