सुरेन्द्र मानन्धरको नेतृत्वमा फेनक्यानको नयाँ कार्यसमिति

हेल्थ टुडे,

काठमाडौं, १८ बैसाख : फूड सप्लिमेन्ट्स व्यवसायीहरुको छाता संगठन नेपाल खाद्य, आयुर्वेदिक, न्यूट्रास्यिूटिकल तथा कस्मास्युटिकल समाज ( फेनक्यान) को राजधानीमा सम्पन्न महाधिवेशनले सुरेन्द्र मानन्धरको अध्यक्षतामा ११ सदस्यिय नयाँ कार्यसमिति चयन गरेको छ । समाजको उपाध्यक्ष मुकुन्द राजभण्डारी, सचिव शम्भु यादव, सहसचिव लक्ष्मीकान्त पाण्डे, कोषाध्यक्ष प्रदीपकुमार महतो र सहकोषाध्यक्षमा आनन्द श्रेष्ठ सर्वसम्मत रुपमा चुनिएका छन । केन्द्रिय सदस्यहरुमा प्रतिमा श्रेष्ठ, विजय उपाध्याय, रविन्द्र श्रेष्ठ, रामदिन साहु र शुर्य बुढाथोकी रहेका छन् ।

तिन वर्ष पहिले स्थापना भएको फूड सप्लिमेन्ट्स व्यवसायीको संगठन फेनक्यानले यस व्यवसायमा संलग्न व्यवसायीहरुको हक,अधिकार संरक्षणका लागि आवाव उठाउदै आइरहेको छ । राजधानीको अन्नपूर्ण होटेलमा आयोजित कार्यक्रम समापन कार्यक्रममा औषधि व्यवसायीहरुले फूड सप्लिमेन्ट्सहरुलाई निर्वाध रुपमा विक्रीबितरण गर्न पाउनु पर्नेमा जोड दिएका छन् । नेपाल औषधि व्यवसायी संघका अध्यक्ष मृगेन्द्र मेहर श्रेष्ठले औषधि व्यवस्था विभागले कुपोषणबाट बच्नकालागि विक्रीबितरण हुने फूड सप्लिमेन्ट्समा अवरोध सिर्जना गरेर दुख दिने काम तत्काल बन्द हुनु पर्ने बताए । फूड सप्लिमेन्ट खाद्य पदार्थको परिपूरकको रुपमा प्रयोग हुने भएकाले यसको विक्रीबितरणमा औषधि व्यवस्थाविभागले हस्तक्षेप गर्न नहुने बताउदै श्रेष्ठले वाणिज्य विभागमा व्यवसाय दर्ता गरेर व्यवसाय गर्न पाउनु पर्नेमा जोड दिए । खाद्य तथा गुण नियन्त्रण विभागका वरिष्ठ खाद्य अधिकृत विमल दाहालले खाद्य नियमावली पास भएपछि अहिलेका समस्या हल हुने दावी गर्दै उक्त नियमावली चाडै पास हुने अवस्थामा रहेको जानकारी दिए । 

कार्यक्रममा नेपाल औषधि आयातकर्ता संघका अध्यक्ष अञ्जन पुडासैनी, महासचिव पवन आचार्य, पीनका अध्यक्ष सुरजित दत्ता, पिडानका अध्यक्ष शिव बास्कोटा, एमआर एसोसिएसनका अनुप पाण्डे लगायतका औषधि व्यवसायसंग सम्बन्धित पदाधिकारीहरुले औषधि व्यवस्था विभागका क्रियाकलापप्रति असहमती जनाउदै आवश्यक परे अधिकार रक्षाका लागि संघर्षमा उत्रन समेत पछि नपर्ने चेतावनी दिएका थिए । फेनक्यानका नव निर्वाचित अध्यक्ष मानन्धरले सबै पक्षको सहयोग र सहकार्यका साथ नेतृत्व अगाडि बढ्ने बताए ।