जेष्ठ महिनालाई स्टार हस्पिटल भ्रमण महिनाका रुपमा मनाईने

ललितपुर : स्टार हस्पिटल सानेपा ललितपुरले ‘स्टार जाउँ, स्टार घुमौँ र स्टारलाई बुझौँ’ भन्ने नाराका साथ जेष्ठ महिनालाई स्टार भ्रमण महिनाका रुपमा मनाउने निर्णय गरेको छ । एक दशकदेखि निरन्तर स्वास्थ्य सेवामा समर्पित अस्पताल, निकै सुविधा सम्पन्न तथा आकर्षक भवनमा सरेको अवस्थामा हस्पिटलको सेवा सुविधा, अत्याधुनिक उपकरण तथा उपचार पद्दती, बरिष्ठ दक्ष चिकित्सक, उपचारको क्रममा लाग्ने खर्चका साथै आगामी दिनमा थप हुने क्रममा रहेका विभिन्न विभाग र सेवा सुविधाका सम्बन्धमा जानकारी दिने उद्देश्यले उक्त कार्यक्रम आयोजना गरिएको अस्पतालले जनाएको हो ।

भ्रमणमा आउनेहरुलाई स्वागत गर्दै, हस्पिटलको बारेमा जानकारी प्रदान गर्नुका साथै सहुलियत दरमा होल वडी चेक अफको सुविधा रहेको अस्पतालका प्रवन्ध निर्देशक डा. शैल रुपाखेतीले जानकारी दिएका छन् । कार्यक्रमलाई भव्यताका साथ सफल बनाउन अस्पतालले आम सर्वसाधारण, विशिष्ट व्यक्तित्व, कलाकार, विभिन्न पेशाकर्मी, व्यवसायी, संघसंस्था, स्कुल, कलेजका प्रतिनिधि, पत्रकार लगायत आफ्नो स्वास्थ्य प्रति सजक सम्पूर्ण महानुभावहरुलाई आग्रह गरेको हस्पिटलका सिईओ डा.सन्देश जिसीले जनाएका छन् ।