इजरायलका प्रवासीले पर्वतका दुई बिरामीलाई गरे आर्थिक सहयोग

पर्वत, १० असारः रोजगारीका लागि इजरायलमा रहेका प्रवासीहरूले पर्वतका दुईजना गम्भीर रोगका बिरामीलाई आर्थिक सहयोग गरेका छन् ।
‘मातृभूमिका लागि पर्वत सेवा समाज इजरायल’ले रक्तक्यान्सर रोगबाट पीडित पर्वतको कुश्मा नगरपालिका–१४ का १५ वर्षीय अर्जुन गौतम र मिर्गौला पीडित पर्वतको कुश्मा नगरपालिका–३ की अमृता शर्मालाई उपचारका लागि झण्डै रु डेढ लाख आर्थिक सहयोग उपलब्ध गराएको हो ।
गौतमलाई रु एक लाख २० हजार र मिर्गौला पीडित शर्मालाई रु २८ हजार सहयोग हन्तान्तरण गरिएको समाजका अध्यक्ष अर्जुन पौडेलले जानकारी दिनुभयो ।
रक्तक्यान्सर पीडित गौतम विगत पाँच महिनादेखि भरतपुर क्यान्सर अस्पतालमा उपचाररत हुनुहुन्छ भने मिर्गौला पीडित शर्मा विगत एक महिनादेखि उपचारका लागि काठमाडौँमा रहनुभएको छ ।
दुई सन्तानकी आमा बनिसकेकी अमृता यतिबेला आफ्ना दुवै मिर्गौलाले काम गर्न छाडेपछि डाइलोसिस गरेर जीवन धान्न बाध्य हुनुभएको छ । दुवै परिवार निकै विपन्न रहेकाले अभियान नै सञ्चालन गरेर रकम संकलन गरिएको अध्यक्ष पौडेलले जानकारी दिनुभयो । शुक्रबार आयोजित सहयोग हस्तान्तरण कार्यक्रममा शिक्षा विकास समन्वय एकाइ पर्वतका प्रमुख उद्धिमराज पौडेलले मानवीय जीवनमा रोगले कतिबेला आक्रमण गर्छ भन्ने कुराको ग्यारेन्टी नहुने बताउँदै विपत्को अवस्थामा सबैले हातेमालो गरेर सहयोग गर्नुपर्ने बताउनुभयो ।
रासस