हेल्थ टुडे,
काठमाडौं, ३० साउनः वीर अस्पतालले पत्थरी, प्रोस्टेट, ट्युमर लगायतका समस्याको सहज उपचारका लागि अत्याधुनिक उपकरण प्रयोगमा ल्याएको छ । अस्पतालले नयाँ लेजर उपकरणबाट सेवा दिन थालेसँग यो प्रविधिबाट सेवा दिने पहिलो सरकारी अस्पतालमा बनेको छ ।
अस्पतालका निर्देशक डा भुपेन्द्र बस्नेतले अस्पतालको सेवा विस्तार गर्ने क्रममा नयाँ उपकरण ल्याइएको बताउनुभयो । यो अत्याधुनिक प्रविधि भित्रिएसंगै बिरामीले सहज र गुणस्तरीय सेवा पाउनेमा आफु विश्वस्त भएको डा बस्नेतले जानकारी दिनुभयो ।
युरो सर्जन डा अनिल श्रेष्ठ यो उपकरण अरु भन्दा आधुनिक र फरक रहेको बताउनुहुन्छ । उहाँका अनुसार लेजर दुई प्रकारका हुन्छन एउटा हाइ पावर र अर्को लो पावर । वीर अस्पतालमा यी दुवै प्रविधि उपलब्ध रहेको बताउदै लो पावर लेजरलाई मिर्गौलाको पत्थरीको उपचारमा र हाइपावरलाई प्रोस्टेटको शल्यक्रियाका लागि प्रयोग गरीएको डा श्रेष्ठले जानकारी दिनुभयो ।
यो प्रविधिबाट उपचार गर्दा बिरामीलाई विगतमा जस्तो ठूलो शल्यक्रिया गर्नु पर्दैैन । प्रोस्टेटको उपचार होलेप अर्थात होल्मिम लेजर इन्युक्लिएसन अफ द प्रोस्टेटबाट गरिन्छ । डा श्रेष्ठका अनुसार १२० वाटको यस प्रविधिले ८० देखि ९० ग्रामका ठूलो प्रोस्टेटको उपचारमा बढी लाभदायक हुन्छ र परिणाम पनि अरुभन्दा राम्रो दिन्छ ।
पत्थरीको उपचारका लागि लेजरको प्रयोग केही समय अगाडि गरिएको भए पनि प्रोस्टेटको भने केही दिन अघि मात्र गरिएको जानकारी दिदै वीर अस्पतालमा लेजरको सेवा सुरु भएसँगै बिरामीको चाप पनि बढ्दै गएको डा श्रेष्ठ बताउनुहुन्छ ।
Leave a Reply