केदारवहादुर अधिकारीले सम्हाले स्वास्थ्य सचिवको जिम्मेवारी

हेल्थ टुडे

काठमाडौं, २४ मंसिर : स्वास्थ्य तथा जनसंख्या मन्त्रालयको सचिवमा सरुवा भएका प्रधानमन्त्री कार्यालयका सचिव केदारबहादुर अधिकारीले सोमबार पदबहाली गरेका छन् । उनलाई गत सोमबारको मन्त्रीपरिषद्ले स्वास्थ्यमा सरुवा गरेको थियो । गत पुषमा स्वास्थ्य सचिव नियुक्त भएकी डा. पुष्पा चौधरीलाई  मन्त्रीपरिषद्ले असोज २८ गते स्वास्थ्यबाट सरुवा गरेर प्रधानमन्त्री कार्यालय फाजिलमा राखेपछि निमित्त सचिवको जिम्मेवारी प्रमुख विशेषज्ञ डा. शुशिल प्याकुरेलले सम्हाल्दै आएका छन् । स्वास्थ्य मन्त्रालय सरुवा भएर आएका अधिकारीलाई निमित्त सचिव डा. प्याकुरेलले स्वागत गरेका थिए । स्वास्थ्य मन्त्रालयमा चिकित्सक मात्र सचिव बन्न पाउने नियम बिपरित प्रशासन तर्फका अधिकारीलाई सचिवको जिम्मा दिइएकोमा नेपाल चिकित्सक संघले त्यसको विरोध गर्दै विरोधमा उत्रिन देश भरिका चिकित्सक र स्वास्थ्यकर्मीलाई आव्हान गरेको छ । अधिकारीले यो भन्दा पहिले सहसचिवको रुपमा स्वास्थ्य तथा जनसंख्या मन्त्रालयको मानव संसाधन साखामा काम गरिसकेका छन् ।