सुदूरपश्चिम प्रदेशमा फागुन ७ देखि विशेष स्वास्थ्य अभियान

हेल्थ टुडे,

काठमाडौं, ३ माघ : सुदूरपश्चिम प्रदेशले आगामी फागुन ७ गतेदेखि प्रतिरोधात्मक र उपचारात्मक दुबै सेवालाई एकैसाथ अगाडि बढाउने गरि बिशेष स्वास्थ्य अभियान सञ्चालन गर्ने भएको छ । ‘स्वच्छ, सवल, भेदभाव रहित समाज, गुणस्तरीय स्वास्थ्य सेवा सुदूरपश्चिमको आवाज ’ मूल नाराका साथ सामाजिक विकास मन्त्रालय स्वास्थ्य निर्देशनालयले यो अभियान सञ्चालन गर्न लागेको हो । बिशेष स्वास्थ्य अभियान सुदूरपश्चिमका ९ वटै जिल्लामा सञ्चालन गरिने छ । स्वास्थ्य मन्त्रालयको समेत जिम्मेवारी सम्हालिरहेका सुदूरपश्चिम प्रदेशका सामाजिक विकास मन्त्री कुष्ण सुवेदीले आगामी फागुन ७ गते कैलालीको मालाखेतीमा मृगौला, मुटु परिक्षण सम्बन्धी वृहत स्वास्थ्य परिक्षण सिविर आयोजना गरि स्वास्थ्य सचेतना र उपचार दुबै सेवा एकैसाथ लैजाने योजना रहेको जानकारी दिए ।

अस्पतालजन्य फोहोर प्रशोधन र व्यवस्थापन सम्बन्धी अध्ययन, अवलोकन भ्रमणका लागि राजधानी आएका मन्त्री सुवेदीले यहाँका वरिष्ठ चिकित्सकहरुले सुदूरपश्चिम प्रदेशले सञ्चालन गर्ने अभियानमा सहयोग गर्न तयार भएपछि उत्साहित भएको बताए । उनले भने, ‘हामी सुदूरपश्चिम प्रदेशलाई स्वास्थ्यको क्षेत्रमा नमुना प्रदेश बनाउन चाहन्छौ । त्यसका लागि हामी सम्पूर्ण शक्ति लगाउन तयार छौ ।’ राष्टिय मृगौला उपचार केन्द्रका कार्यकारी निर्देशक एवं वरिष्ठ मृगौला रोग विशेषज्ञ डा. ऋषिकुमार काफ्लेले सुदूरपश्चिम प्रदेशलाई केन्द्रले व्यक्तिगत रुपमा आफुले पनि सक्दो सहयोग गर्ने बचन दिए । फागुन ७ गतेदेखि सुरु हुने विशेष स्वास्थ्य अभियानको सुभारम्भका लागि आफु सहित केन्द्रको टोली कैलाली जाने उनले जानकारी दिए ।

सुदूरपश्चिम प्रदेशका स्वास्थ्य निर्देशक डा. गुणराज अवस्थीले स्वास्थ्य क्षेत्रमा काम गर्ने परम्परागत शैली र एकजनाको प्रयासले मात्र सुदूरपश्चिमको स्वास्थ्य क्षेत्रमा सुधार नआउने दाबी गर्दै त्यसका लागि महाभारतको अभिमन्यूले लडेको जस्तो लडाई लड्न तयार हुनु पर्नेमा जोड दिए । पछिल्ला वर्ष शिक्षितहरुको संख्या बढेको भएपनि स्वास्थ्य सम्बन्धी सचेतना अभावमा हजारौले अकालमा ज्यान गुमाइरहेकोले सचेतना पनि उत्तिकै आवश्यक रहेको डा. अवस्थीले बताए । सामाजिक विकास मन्त्रालयका सचिव गोगनबहादुर हमाल, स्वास्थ्य महासाखा प्रमुख नरेद्रसिंह कार्की, वरिष्ठ स्वास्थ्य अधिकृत दयाकृष्ण पन्त, जनस्वास्थ्य अधिकृत मंगल शाही, चिकित्सक र स्टाफ नर्स सहितको टोलीले बुधबार त्रिवि शिक्षण अस्पताल र बिहीबार बनस्थलीस्थित राष्टिय मृगौला उपचार केन्द्रको अस्पतालजन्य फोहोर प्रशोधन र व्यवस्थापन सम्बन्धी भइरहेको नयाँ प्रविधि र गतिविधिको अवलोकन भ्रमण गरेको छ । यहाँका अस्पतालमा भइरहेको फोहोर मैला व्यवस्थापन प्रविधि सुदूरपश्चिमका स्वास्थ्य संस्थामा पनि लागु गर्न मन्त्री सुवेदीको नेतृत्वमा टोली काठमाडौ आएको हो ।