कर्मचारी समायोजनमा स्वास्थ्य सेवाका कर्मचारीको गुनाशै गुनाशो

हेल्थ टुडे,
काठमाडौ,६ बैशाखः
कर्मचारी समायोजनमा असन्तुष्ट स्वास्थ्य सेवा अन्र्तगतका १३ हजार भन्दा बढी कर्मचारीले गुनाशो दर्ता गराएका छन् । उनीहरुले स्वास्थ्य सेवाका कर्मचारीको समायोजनका क्रममा व्यापक त्रुटि भएको भन्दै गुनासो दर्ता गराएका हुन् । सरकारले कर्मचारी समायोजनका क्रममा भएको त्रुटि सच्याउन भन्दै बिहिबारसम्म गुनासो दर्ता गर्न समय दिएको थियो ।

बिहिबार साँझसम्म स्वास्थ्य तथा जनसंख्या मन्त्रालयमा ७ हजार, संघीय मामिला तथा सामान्य प्रशासन मन्त्रालयमा ४ हजार र गुनासो सुन्ने कर्मचारीको इमेलमा २ हजार गरी जम्मा १३ हजार गुनासो दर्ता भएको स्वास्थ्य मन्त्रालयले जनाएको छ । स्वास्थ्य मन्त्रालयले उजुरी मध्ये केहीले स्वास्थ्य र सामान्य प्रशासन तथा इमेलमा समेत उजुरी गरेका कारण उजुरी होहोरिएको र दोहोरिएका उजुरीलाई हटाएपनि स्वास्थ्यमा करिब ८ हजार जनाको उजुरी परेको हुनसक्ने जनाएको छ ।

उजुरीलाई केलाएर सरकारले उचित रुपमा समायोजनको काम अगाडि बढाउने मन्त्रालयले जनाएको छ । समायोजनको काममा ढिलाइ भएपछि स्वास्थ्य मन्त्रालयले बिहिबार विज्ञप्ति जारी गरी कर्मचारीलाई समायोजनको पत्र प्राप्त नभएसम्म हाल कार्यरत कार्यालयबाट नै सेवा प्रवाह गर्न निर्देशन दिएको छ ।