डेंगु ज्वरोको प्रकोप नियन्त्रण बाहिरः केन्द्रबाट पठाईयो सात सय किट

हेल्थ टुडे,
धरान,२० जेठः विगत तीनसाता यता सुनसरीको धरानमा फैलिएको डेंगु ज्वरोको प्रकोप नियन्त्रणबाहिर गएको छ । प्रकोप नियन्त्रण बाहिर गएपछि स्थानीय सरकारले प्रदेश र संघीय सरकारलाई गुहारेको छ । डेंगुको प्रकोप नियन्त्रण गर्न स्थानीय स्तरको प्रयास सम्भव नभएपछि धरान उपमहानगरपालिकाले प्रदेश र संघीय सरकारलाई पत्राचार गर्दै सहयोग मागेको हो । धरान उपमहानगरपालिकाकी कार्यवाहक प्रमुख मञ्जु भण्डारी सुवेदीले भनिन्ः‘ हामीले सकेसम्म डेंगु नियन्त्रण प्रयास गरिरहेकै छौं तर नियन्त्रणमा नआएकाले चिन्तित छौं,काबुबाहिर जान लागेकाले प्रदेश र संघीय सरकारबाट पनि सहयोग आवश्यक छ ।’

धरानमा पछिल्लो ३ सातामा ७५ जना डेंगुका बिरामी भेटिएको पुष्टि भइसकेको छ। सबै बिरामी स्वास्थ्यसंस्थाको सम्पर्कमा नआएकाले यो संख्या अझै बढी हुनसक्ने चिकित्सक बताउँछन्। डेंगुको प्रकोप क्षेत्रमा नियमित फगिङको काम भइरहेको छ। चिकित्सकसहितको ¥यापिड रेस्पोन्स टिमसमेत गठन गरिएको छ। तर डेंगु नियन्त्रणमा आउन सकेको छैन। डेंगु संक्रमित पोथी लामखुट्टेबाट मानिसमा संक्रमण हुने भएकाले पूर्णरुपमा नियन्त्रणमा ल्याउन लामखुट्टेका अन्डा र लार्भा नष्ट गर्नुपर्ने विज्ञ चिकित्सकले बताएका छन् ।

धरानस्थित बिपी कोइराला स्वास्थ्यविज्ञान प्रतिष्ठानमा पछिल्लो समय बिरामीको चापले गर्दा मेडिसिन विभागमा बेड अभाव छ। बिरामीलाई आकस्मिक कक्षमै राखेर उपचार गर्नुपर्ने अवस्था आएको अस्पतालले जनाएको छ। १४ वर्षमुनि र ६० वर्ष उमेरमाथिका मानिसलाई डेंगु संक्रमण भए अवस्था गम्भीर पनि हुनसक्ने चिकित्सक बताउँछन्।

यसैबीच, सुनसरीको धरानमा तीन सातादेखि फैलिएको डेंगु परीक्षणका लागि राष्ट्रिय इपिडियोमोलोजी तथा रोग नियन्त्रण महाशाखाले ७ सय थान किट पठाएको छ। जसमध्ये दुई सय पहिला र ५ सय किट आइतबार पठाइएको महाशाखाले जनाएको छ। डेंगुबाट धरान उपमहानगरपालिकाको वाड १५ र ८ डेंगु रोगबाट बढी प्रभावित भएको महाशाखाले जनाएको छ। महाशाखाका अनुसार वडा ९, ७ र १३ मा समेत यो रोग फैलिन थालेको छ। डेंगु संक्रमणबाट कसैको मृत्यु नभएको जनाउँदै महाशाखाले हालसम्म नियन्त्रणभित्रै रहेको दाबी गरेको छ ।