नेशनल बाथ सेन्टरले मनायो  छैटौ बार्षिकोत्सव

हेल्थ टुडे,

काठमाडौं, २२ जेठ :  नेशनल बाथ सेन्टर रातोपुल छैटौ वर्षमा प्रवेश गरेको छ । सेन्टरले बुधबार  छैटौ बार्षिकोत्सवको आयोजना गरेको छ । बार्षिकोत्सव कार्यक्रममा शिक्षा तथा विज्ञान प्रविधि मन्त्री गिरिराजमणि पोखरेलले बाथ रोगका क्षेत्रमा अझै गहन अध्ययन आवश्यक रहेको बताए । बाथ रोगका क्षेत्रमा पछिल्ला वर्ष नेशनल बाथरोग सेन्टरले उत्साहप्रद काम गरिरहेकोमा खुशी व्यक्त गर्दै मन्त्री पोखरेलले सेन्टरले उपचार सेवासँगै बाथ रोगका क्षेत्रमा अनुसन्धान र जनचेतनाको काम पनि संगै लैजानुपर्ने आवश्यकतामा जोड दिए । उनले भने, उपचार दिएर मात्र पुग्दैन । उपचारसँगै बाथरोगका क्षेत्रमा गहन अनुसन्धान र शिक्षाको पनि उत्तिकै खाचो छ । स्वास्थ्य क्षेत्रमा प्रसस्त जनशक्ति भए पनि उनीहरुले अनुसन्धानलाई महत्व नदिएकाले अनुसन्धानमा अहिले पनि विदेशीको भर पर्नु परिरहेको औल्याउदै पूर्व स्वास्थ्य मन्त्री समेत रहेका मन्त्री पोखरेलले जागिरे मन्स्थितिबाट माथि उठेर अनुसन्धानमा लाग्नु पर्ने सुझाव दिए ।

सेन्टरका वरिष्ठ बाथरोग विशेषज्ञ डा. विनित बैद्यले पछिल्लो एक दशकमा बाथ रोगको उपचारमा धेरै प्रगति भएको जानकारी दिदै सेन्टरले गुणस्तरीय सेवा प्रदान गरिरहेको बताए । सेन्टरका प्रवन्ध निर्देशक रोषन कक्षपतिले बाथ रोगको उपचारमा भरपर्दो उपचार केन्द्रका रुपमा सेन्टरलाई विकास गर्न लागिपरेको बताए । नेशनल बाथ सेन्टरले अहिले रातोपुलका अलावा जावलाखेल, टेखापुखु, पोखरा र झापामा समेत साखा खोलेर उपचार सेवा प्रदान गरिरहेको छ । कार्यक्रममा समाजसेवाका विभिन्न विधामा उल्लेखनिय कार्यगर्ने व्यक्तित्वहरुलाई सम्मान समेत गरिएको थियो ।