हेल्थ टुडे,
चितवन,३० असारः बिपी कोइराला मेमोरियल क्यान्सर अस्पताल भरतपुर झण्डै १० महिनाअघिदेखि नेतृत्व विहीन छ । गत असोज ३ गतेबाट रिक्त रहेको अध्यक्ष पदमा अझै नियुक्ति हुनसकेको छैन । अध्यक्ष अभावका कारण एशियाकै नमूना अस्पतालको रुपमा विकास गर्न लागिएको यो अस्पतालको व्यवस्थित विकासमा बाधा पुग्ने देखिएको छ ।
अध्यक्ष डा. प्रकाशचन्द्र न्यौपानेले आफ्नो तीन वर्षे कार्यकाल पूरा गरेसँगै विभिन्न व्यक्तिको नाम चर्चा चलेपनि सरकारले यसको टुङ्गो लगाउन सकेको छैन । स्वास्थ्यमन्त्रीको प्रस्तावमा मन्त्रिपरिषद्ले अध्यक्षको नियुक्ति गर्ने प्रावधान छ । अस्पतालका कार्यकारी निर्देशक डा. विजयचन्द्र आचार्यका अनुसार एम डि गरेर क्यान्सर अस्पतालमा १५ वर्ष वा बाह्य अस्पतालमा २० वर्ष काम गरेको अनुभव भएका व्यक्ति मात्र अध्यक्षका लागि योग्य हुने अस्पतालको नियमावलीमा उल्लेख छ ।
सबै योग्यता पुगेका व्यक्ति कम भएकाले पनि अध्यक्षको टुङ्गो लाग्न ढिला भएको अनुमान गरिएको छ ।
Leave a Reply