हेल्थ टुडे,
काठमाडौं, २२ जेठ : कोरोना संक्रमणका बेला स्वास्थ्यजन्य सामग्री खरिदमा बिबादास्पद् ओम्बी ग्रुपसँग मुछिएका स्वास्थ्य सेवा विभागका महानिर्देशक महेन्दप्रसाद्र श्रेष्ठ मन्त्रालय तानिएका छन् । विभागको महानिर्देशकको जिम्मा डा. दीपेन्द्ररमण सिंहलाई दिइएको छ । स्वास्थ्य तथा जनसंख्या मन्त्री भानुभक्त ढकालले मन्त्रीस्तरिय निर्णय गर्दै श्रेष्ठलाई विभागको महानिर्देशकबाट हटाएर डा.सिहलाई महानिर्देशक बनाएका हुन । कोरोना भाइरस रोकथाम र उपचारका लागि प्रयोग हुने स्वास्थ्यजन्य सामग्री खरिद गर्ने बेला गत महिना विवादास्पद् ओम्नी ग्रुपसँग स्वास्थ्य सामग्री खरिद गर्दा अस्वभाविक मूल्य बढाएर मिलेमतो गरेको आरोप महानिर्देशक श्रेष्ठमाथि लागेपछि उनी विवादमा तानिएका थिए । जनस्तरबाट समेत दवाव परेपछि श्रेष्ठले ओम्नीसंगको खरिद सम्झौता रद्द गरेका थिए ।
मन्त्री ढकालले श्रेष्ठलाई मन्त्रालय तानेर डा.सिंहलाई महानिर्देशकको जिम्मा दिएका हुन । श्रेष्ठ गत फागुन ८ गते निमित्त महानिर्देशक भएका थिए । फागुन १२ गते श्रेष्ठ १२ औं तहमा बढुवा भएपछि महानिर्देशक बनेका थिए । स्वास्थ्य सेवा विभागको महानिर्देशक हुन बाह्रौ तहको हुनु पर्ने नियम छ । अहिले स्वास्थ्य तथा जनसंख्या मन्त्रालयमा ३ जना बाह्रौ तहका छन् । श्रेष्ठ, डा. सिंहसँगै डा. रोसन पोखरेल बाह्रौ तहका हुन । डा. पोखरेललाई विभागको महानिर्देशकबाट मन्त्रालय तानेर मन्त्री ढकालले श्रेष्ठलाई महानिर्देशक बनाएका थिए । त्यसैगरि व्यवस्थापन महासाखाको निर्देशक भोगेन्द्र डोटेललाई पनि मन्त्रालय तानिएको छ । व्यवस्थापनको जिम्मा डा. रमेश खरेललाई दिइएको छ । खरेल राष्टिय एचआईभी एड्स तथा यौन रोग नियन्त्रण केन्द्रका निर्देशक थिए ।
त्यसैगरि प्रसूति गृहका निर्देशक डा. जोगेश्वर गौतमलाई पनि मन्त्रालय तानिएको छ । नव नियुक्त महानिर्देशक डा. सिंह विवादमा नपर्ने हाकिमका रुपमा चिनिन्छन । उनले यस अगाडि महाकाली अञ्चल अस्पतालको मेसु, राष्टिय एचआईभी एड्स तथा यौन रोग नियन्त्रण केन्द्रका निर्देशक र मन्त्रालयका अगुगमन महासाखा लगायतका विभिन्न जिम्मेवारी सम्हाली सकेका छन् ।
