कोरोना संक्रमित चिकित्सकहरुको उपचारमा चिकित्सक संघको चासो, संक्रमित र प्रभावित चिकित्सकको विवरण उपलब्ध गराउन साखाहरुलाई पत्राचार

हेल्थ टुडे,

काठमाडौं  : पछिल्ला दिन कोरोना संक्रमितको उपचारमा संलग्न चिकित्सक समेत संक्रमित हुनेको संख्या बढे पनि सरकारले उनीहरुको उपचारमा चासो नदिएको भन्दै देशभरिका चिकित्सकहरुको छाता संगठन नेपाल चिकित्सक संघ (एनएमए) ले कोरोना संक्रमित र प्रभावित चिकित्सकहरुको उपचारमा चासो देखाएको छ ।

एनएमएले आफू मातहत देशभरिका नेपाल चिकित्सक संघका साखाहरुलाई कोरोना संक्रमित र प्रभावित चिकित्सकहरुको विवरण केन्द्रमा पठाउन पत्राचार गरेको छ । एनएमएको तथ्यांक अनुसार अहिलेसम्म ७० जना भन्दा बढी चिकित्सक कोरोना संक्रमित भएका छन् । देशभरि संक्रमित चिकित्सकहरुको संख्या त्यो भन्दा बढी भएको हुन सक्ने उसको आकलन छ ।

देशभरिबाट प्राप्त विवरणका आधारमा संघले आफ्ना सदस्यहरुको जिवन रक्षा र उपचारका लागि बिषेश पहल गर्नु पर्ने देखिएकोले साखाहरुलाई विवरण पठाउन पत्राचार गरेको नेपाल चिकित्सक संघका अध्यक्ष डा.लोचन कार्कीले बताए । कोरोना संक्रमितको उपचारमा फ्रन्ट लाइनमा रहेर उपचार गरिरहेका चिकित्सकहरु आफै संक्रमित भएपछि उनीहरुको उपचारमा सरकारले चासो र चिन्ता नदेखाएर गैरजिम्मेवारपूर्ण काम गरेको डा. कार्कीको आरोप छ । उनले भने, ‘ संक्रमित चिकित्सक आफै अस्पताल र शैय्या खोज्दै जानु परिरहेको छ । कत्तिलाई त हामीले शैय्या खोजीदिनु परेको छ । सरकार यस बिषयमा संवेदनशिल नै देखिएन । ’

देशभरिमा कति जना चिकित्सक संक्रमित छन भन्ने बिषयमा समेत सरकारले  सत्यतथ्य जानकारी दिन नचाहेको बताउदै डा.कार्कीले संघले देशभरिका संक्रमित र प्रभावित सबै सदस्य चिकित्सकहरुको विवरण चाडै संकलन गरेर उनीहरुको उपचार र सेवा सुविधाका लागि ठोस पहल गर्ने बताए । नेपाल चिकित्सक संघको देशभरि करिव १० हजार चिकित्सक सदस्य छन् ।