चीनबाट आज ८ लाख डोज कोरोनाविरुद्धको खोप आइपुग्दै

हेल्थ टुडे,

काठमाडौं, १६ चैत : चीन सरकारको सहयोगमा आज ८ लाख डोज कोरोनाविरुद्धको खोप काठमाडौं आइपुग्दैछ । भारतले २० लाख डोज कोभिसिल्ड खोप दिने सम्झौता अनुसार अग्रिम पैसा बुझे पनि १० लाख डोज उपलब्ध गराउन आनाकानी गरेपछि नेपालमा खोप अभावमा खोप अभियान स्थगित गरिएको छ ।  चीन सरकारले सहयोग गरेको आठ लाख डोज खोप आज काठमाडौं आउन लागेको हो ।

खोप लिन राष्ट्रिय ध्वजावाहक नेपाल वायुसेवा निगम (नेपाल एयरलाइन्स) को वाइडबडी ३३० जहाज खोप लिन आइतबार अपराह्न चीनको राजधानी बेइजिङ गएको थियो ।

चीन सरकारले कोरोनाविरुद्धको ‘भेरासेल’ खोप नेपाललाई उपलब्ध गराउन लागेको हो । चीनको सिनोभ्याक बायोटेकले उत्पादन गरेको सो खोपलाई २ देखि ८ डिग्री सेल्सियसमा भण्डारण गर्न सकिन्छ । यो खोप दुई मात्रा लगाउनुपर्छ ।

विभिन्न परीक्षणहरूमा चिनियाँ खोप नेपालले हाल प्रयोग गर्दै आएको कोभिसिल्ड खोपभन्दा बढी प्रभावकारी देखिएको अधिकारीहरु बताउँछन् । यद्यपि भेरासेल खोप कोभिसिल्डको तुलनामा महँगो पर्दछ ।