हेल्थ टुडे,
काठमाडौं, ३ जेठ : राजधानी काठमाडौंका सरकारी अस्पतालहरुमा कोभिड ओपिडी सेवा सुरु गरिएको छ । अस्पतालका कोभिड ओपिडीमा कोभिड पोजिटिभ बिरामी जाचेर सामान्य भएमा घर पठाउने, अक्सिजन चाहिए ओपिडीमै दिने र हेर्ने, सिरियस भए भर्ना गर्ने गरि व्यवस्था मिलाइएको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले जानकारी दिएका छन ।
डा. गौतमले समाजिक सञ्जालमार्फत भनेका छन्, ‘निजी अस्पतालहरुले पनि कोभिड ओपिडी सञ्चालन गर्न भनिएको छ । ’ कोभिड ओपिडी संचालनमा आएपछि अस्पतालको भर्ना र अक्सिजनको चाप घटाउने विश्वास स्वास्थ्य तथा जनसंख्या मन्त्रालयले गरेको छ । डा.गौतमका अनुसार कोभिड ओपिडीले अक्सिजन र बेड नपाउने समस्या कम हुनेछ । अक्सिजन प्लाण्ट, लिक्विड अक्सिजन ट्यान्क, अक्सिजन कन्सन्टेटर र सिलिण्डरको ब्यबस्थापन भइरहेकोले केही दिनमा अवस्था सहज भएर आउने विश्वास डा. गौतमको छ ।
