कोरोना उपचारमा खटिएका चिकित्सकलागि चिकित्सक संघ बनायो १०० बेडको कोरेन्टीन

हेल्थ टुडे,

काठमाडौं, ३ जेठ : कोरोना संक्रमितको उपचारमा खटिएका चिकित्सकहरुको व्यक्तिगत स्वास्थ्य सुरक्षाका लागि नेपाल चिकित्सक संघले १०० बेडको सुविधा सम्पन्न कोरेन्टीन सेन्टर सञ्चालन गर्ने भएको छ । उक्त कोरेन्टीन सेन्टरको आज उद्घाटन हुने संघका महासचिव डा. बद्री रिजालले जानकारी दिएका छन् ।

कोरोना उपचारमा संलग्न चिकित्सकहरु आफै संक्रमित भएपछि सुरक्षित तवरले कहाँ बस्ने भन्ने समस्या देखिएपछि संघले अग्रवाल सेवा केन्द्र, हिन्दु सेवक संघ र सेवा इन्टरनेशनलको सहकार्यमा उक्त कोरेन्टीन सेन्टर सञ्चालनमा ल्याउन लागेको हो । उक्त कोरेन्टीन सेन्टरलाई केही समयपछि आइसोलेसन सेन्टर समेत सञ्चालन गर्ने योजना संघले बनाएको छ । संघका महासचिव डा. रिजालले क्यारेन्टीनको उद्घाटन आज बिहान ११ बजे नेपालका लागि भारतीय राजदूत विनय मोहन क्वात्राले गर्ने छन् ।

क्वारेन्टीन सञ्चालनका लागि नेपाल चिकित्सक संघका तर्फबाट केन्द्रिय सदस्य डा. प्रमोद जोशीको संयोजकत्वमा केन्द्रिय सदस्य डा. रितेश थापा र वरिष्ठ प्रशासकिय अधिकृत मिलन खनाल रहेको कमिटी समेत गठन गरिएको संघका महासचिव डा. रिजालले जानकारी दिएका छन् । क्वारेन्टीमा बस्ने चिकित्सकका लागि दिनमा ४ पटक स्वस्थ्य खाना उपलब्ध हुने छ । केही समयपछि सञ्चालन हुने आइसोलेसन सेन्टरमा अक्सिजन, अत्यावश्यक औषधि एवं स्वास्थ्य परिक्षणको व्यवस्था गरिने संघले जनाएको छ । फाइल तस्बिर : दी हिमालय टाइम्स