हेल्थ टुडे,
काठमाडौं, २८ फागुन : नेपाल औषधि उत्पादक संघ (एपन) का अध्यक्ष विप्लव अधिकारीले नेपाली औषधिको गुणस्तर माथि शंका नगर्न आगैह गरेका छन । उनले नेपाली औषधि उद्योगको उपलब्धिहरूको चर्चा गर्दै उच्च गुणस्तरमा उत्पादन भइरहेको बताएका छन् ।
नेपाल फार्मा एक्स्पो २०२६ को बिहीबार उद्घाटनका क्रममा उनले भने, ’हामी गर्व गर्छौं कि नेपाली औषधि उद्योगीहरूले उच्च गुणस्तरीय औषधि निर्माण गरिरहेका छन्। आज करिब ५० प्रतिशत औषधि बजारमा नेपालीहरूले प्रयोग गरिरहेका छन् भने उत्पादनको हिसाबले करिब ७० प्रतिशत औषधि स्वदेशमै बनाइरहेका छौं। यो केवल गर्वको विषय मात्र होइन, देशलाई औषधिमा आत्मनिर्भर बनाउने ज्वलन्त उदाहरण पनि हो।’
अधिकारीले एक्सपोको उद्देश्य औषधि निर्माणमा प्रयोग हुने विश्वव्यापी प्रविधि र नविनतम उपकरणहरू प्रदर्शन गर्नु रहेको उल्लेख गरे। ’यस एक्सपोले नेपाली औषधि उद्योगको क्षमता, संवेदनशीलता र गुणस्तरको प्रमाण देखाउने अवसर दिनेछ। नेपाली औषधि अब विश्व परिवेशमा प्रतिस्पर्धा गर्न सक्षम छ र झन्डै १४ मुलुकमा निर्यात भइसकेको छ,’ उनले भने।उनले उपस्थित सबै सरोकारवालाहरूसँग आग्रह गर्दै देशमा आवश्यक औषधि उत्पादन र प्रवद्र्धनका लागि नीतिगत सुधार र नविन नीतिहरू अपनाउनु जरुरी रहेको बताएका छन् । स्वास्थ्य तथा जनसंख्या मन्त्री डा. सुधा शर्माले सरकारले स्वदेशी औषधि उद्योगलाई सहुलियत दिएर अगाडि बढ्नुको विकल्प नभएको बताइन ।
Leave a Reply