हेल्थ टुडे,
काठमाडौं, २७ असार : कोभिड– १९ युनिफाईड केन्द्रीय अस्पतालको रुपमा काम गरिरहेको वीर अस्पतालको नवनिर्मित सर्जिकल भवनको एक समारोहबिच प्रधानमन्त्री केपी शर्मा ओलीले आईतबार उद्घाटन गरेका छन् । कोभिड– १९ का विरामीको उपचार सेवा सञ्चालन गरिसकेको वीर अस्तातालको यो नयाँ सर्जिकल भवनमा ५०० शैया रहने कोभिड– १९ युनिफाईड केन्द्रीय अस्पतालका प्रमुख प्रशासकीय अधिकारी डा. जागेश्वर गौतमले जानकारी दिए । यो भवनमार्फत सेवा सञ्चालन भएपछि वीरमा थप १०० शैयाको आईसियू शैया थपिने, मिगौला फेल भएका विरामीका लागि १०० वटा डाइलासिस मेसिन सञ्चालन हुने र शल्यक्रियाको संख्या पनि बढ्ने डा. गौतमले जानकारी दिए । सर्जिकल भवन सहित वीरको सेवा विस्तारका लागि नेपाल सरकारले ८३१ वटा थप दरबन्दी स्विकृत गरेको डा. गौतमले बताए । उद्घाटन कार्यक्रममा स्वास्थ्य तथा जनसंख्या मन्त्रालयको समेत कार्यभार सम्हालीरहेका कृष्णगोपाल श्रेष्ठ, न्याम्सको उपकुलपति डा. डीएन शाह सहित स्वास्थ्य मन्त्रालयका अधिकारीको उपस्थिति रहेको थियो । उक्त सिर्जकल भवनको सिलान्यास २०७४ फागुन २५ मा गरिएको थियो ।
