हेल्थ टुडे,
काठमाडौं, १० चैत : कर्णाली प्रदेशमा एक वर्षभित्रै मिर्गौला प्रत्यारोपण सेवा र डायलासिस सेवा विस्तार हुने भएको छ । शहिद धर्मभक्त राष्ट्रिय प्रत्यारोपण केन्द्र, भक्तपुर र कर्णाली प्रदेश अस्पताल सुर्खेतबिच बिहीबार सम्झौता भएको छ । सम्झौतामा शहिद धर्मभक्त राष्ट्रिय प्रत्यारोपण केन्द्र, भक्तपुरका केन्द्रका कार्यकारी निर्देशक एवं वरिष्ठ अंग प्रत्यारोपण सर्जन डा. पुकारचन्द्र श्रेष्ठ र कर्णाली प्रदेश अस्पताल सुर्खेतका निर्देशक प्रा. डा. डम्बर खड्काले हस्ताक्षर गरेका छन् ।
देशका सात वटै प्रदेशमा मिर्गौला प्रत्यारोपण सेवा सुरु गर्ने र डायलासिस सेवा बिस्तार गर्ने उद्देश्य अनुसार शहिद धर्मभक्त राष्ट्रिय प्रत्यारोपण केन्द्रले विभिन्न प्रदेशसँग सहकार्य गर्न थालेको छ । यो भन्दा पहिले केन्द्रले गण्डकी प्रदेशमा मिर्गौला प्रत्यारोपण सेवा सुरु गर्ने सम्झौता गरेको थियो । डा. श्रेष्ठ र डा. खड्काले बिहीबार गरेको सम्झौता अनुसार यसै आर्थिक वर्ष भित्रै प्रदेश अस्पताल सुर्खेतमा मिर्गौला प्रत्यारोपण सुरु गरिने छ भने प्रदेश मातहतका विभिन्न अस्पतालहरुमा डायलासिस सेवा बिस्तार हुने छ । उक्त कार्य गर्नका लागि शहिद धर्मभक्त राष्ट्रिय प्रत्यारोपण केन्द्र, भक्तपुरका केन्द्रले अन्तरगतको जनशक्तिको तालिम, अध्यापनको व्यवस्था गर्ने छ ।
यसका साथै प्रदेश अस्पताल सुर्खेत अन्तरगत शहिद धर्मभक्त राष्ट्रिय प्रत्यारोपण केन्द्रमा मिर्गौला प्रत्यारोपण फेलोसिप, डएम, नेफ्रोलोजी, नर्सिड बिषयमा स्नातक र स्नातकोत्तर कार्यक्रम सञ्चालन गर्न आवश्यक गृह कार्य समेत गरिने सम्झौता पत्रमा उल्लेख गरिएको छ ।
