हेल्थ टुडे,
काठमाडौं, १८ बैसाख : अन्तर्राष्ट्रिय परिवार नियोजन महासंघ (आईपीपीएफ) का महानिर्देशक डा. अल्भारो बर्मेजोले जनसंख्या बढ्ने दर घटेपनि नेपालमा अझै परिवार नियोजनको आवश्यकता रहेको बताएका छन् । चार दिने भ्रमणका लागि आईतबार काठमाडौं आइपुगेका महानिर्देशक डा. बर्मेजोले जनसंख्या वृद्घिदर घट्दैमा परिवार नियोजनको औचित्य नसकिने भन्दै खुशी र व्यस्थित परिवार निर्माणका लागि परिवार नियोजनमा सरकारले लगानी बढाउनु पर्नेमा जोड दिएका छन् ।
नेपाल परिवार नियोजन संघको केन्द्रिय कार्यालय पुल्चोकमा समाजका विभिन्न तह र तप्काका प्रतिनिधिहरुसँगको अन्तरक्रियामा डा. बर्मेजोले जपान लगायतका संसारका थुप्रै देशहरुमा जनसंख्या बढ्ने दर घटेको भए पनि परिवार नियोजनको औचित्य अझ बढ्दै गइरहेको बताए ।
उनले भने,‘परिवार नियोजन सेवालाई हामीले जनसंख्या घट्ने र बढ्नेसँग मात्र हामीले हेर्नु हुदैन । परिवार नियोजन सेवा त हरेक व्यक्ति र परिवारका लागि व्यवस्थित परिवार निर्माणका लागि नभई हुदैन । ’
नेपाल भ्रमणका क्रममा आफुले प्रधानमन्त्री पुष्पकमल दाहाललाई भेटेर परिवार नियोजन सेवामा लगानी बढाउन आग्रह गर्ने डा. बर्मेजोले जानकारी दिए । नेपालमा यौन तथा प्रजनन् स्वास्थ्यका क्षेत्रमा नेपाल परिवार नियोजन संघले गरिरहेको काम प्रसंसनिय रहेको भन्दै डा. बर्मेजोले भविश्यमा पनि संघलाई आईपीपीएफको सहयोग जारी रहने बताए । आईपीपीएफ दक्षिण एशियाली क्षेत्रकी क्षेत्रिय निर्देशक सोनल मेहताले समुदायमा परिवार नियोजनका बिषयमा व्यापक जनचेतना नभएकाले परिवार नियोजनलाई जनसंख्यासँग मात्र हेर्ने गरिएको बताउदै जनचेतना बिस्तार गर्दै परिवार नियोजन सेवा व्यापक बनाउदै लैजानु पर्ने आवश्यकता रहेको बताइन ।
नेपाल परिवार नियोजन संघका अध्यक्ष हिमाल कसजूले अहिले पनि २५ प्रतिसत नेपालीले चाहेको बेला परिवार नियोजनका साधन पाउन नसकेको तथ्यांक प्रस्तुत गर्दै परिवार नियोजन सेवा जनताको अधिकार भएकोले सरकारले यसबाट पन्छिन नमिल्नेमा जोड दिए ।
संघका कार्यकारी निर्देशक डा.नरेश प्रताप केसीले नेपालको कुल परिवार नियोजन सेवाको २० प्रतिसत हिस्सा नेपाल परिवार नियोजन संघले पुर्याइरहेको दावी गर्दै यौन तथा प्रजनन् स्वास्थ्यको क्षेत्रमा सरकारले लगानी घटाउने अवस्था नरहेको बताए । कार्यक्रममा महिला यौनकर्मी,अपांगता भएका व्यक्ति, यौनिक अल्यसंख्यक , एचआईभी संक्रमित सहित सरोकारवाला निकायमा प्रतिनिधिहरुले परिवार नियोजन सेवाको निरन्तरताका लागि आईपीपीएफले सहयोग जारी राख्ने पर्नेमा जोड दिएका थिए । आईपीपीएफले बिगत ६२ वर्षदेखि नेपालमा नेपाल परिवार नियोजन संघ मार्फत आर्थिक र प्राविधिक सहयोग उपलब्ध गराउदै आइरहेको छ ।
जनसंख्या बढ्ने दर घटेपनि नेपालमा अझै परिवार नियोजनको आवश्यकता छ : डा. बर्मेजो
![जनसंख्या बढ्ने दर घटेपनि नेपालमा अझै परिवार नियोजनको आवश्यकता छ : डा. बर्मेजो](http://healthtodaynepal.com/wp-content/uploads/2023/05/aaja-fpan-41760890_n.jpg)
Leave a Reply