स्वास्थ्य मन्त्री बस्नेतको निर्देशन, ३ करोड जनताको स्वास्थ्यको ख्याल गरेर काम गर्नुस्

हेल्थ टुडे,
काठमाडौं, २४ बैसाख : स्वास्थ्य तथा जनसंख्या मन्त्री मोहनबहादुर बस्नेतले ३ करोड जनताको स्वास्थ्यलाई ख्याल गरेर काम गर्न मातहतका निकायलाई निर्देशन दिएका छन । आईतबार मन्त्रालयमा आयोजित कार्यक्रममा मन्त्रालय मातहतका ५ वटै महासाखाका कर्मचारीलाई निर्देशन दिदै मन्त्री बस्नेतले अन्य मन्त्रालयको तुलनामा स्वास्थ्य मन्त्रालयको काम संवेदनशील भएकाले जनताको स्वास्थ्यलाई ध्यानमा राखेर नीति योजना बनाउन पर्नेमा जोड दिएका हुन । स्वास्थ्य मन्त्रालय अहिले आगामी बर्षको बजेटमा गृहकार्यमा जुटेकोले विपन्न जनताले स्वास्थ्य सेवा पाउने ग्यारंटी गर्ने किसिमले बजेट विनियोजन गर्न मन्त्री बस्नेतले कर्मचारीहरुलाई निर्देशन दिए । चिकित्सक र कर्मचारीले सफलताका साथ जिम्मेवारी बहन गरे मात्र जनताले सहज उपचार सेवा पाउने र त्यसकै आधारमा मन्त्री पनि सफल हूने बस्नेतले बताए । सरकारी अस्पतालमा कार्यरत चिकित्सक अब्बल भए पनि विरामीको चाप बढी हुने भएकाले उपचार ढिलो हुने गरेको स्मरण गराउदै चिकित्सकहरुका समस्या पनि मन्त्रालयले सुनेर तिनको सम्बोधन हुनु पर्ने बताए । निजी क्लिनिकमा काम गर्ने चिकित्सकहरुले विरामी जाचे बाफतको शुल्क बढाउन लागेको आफुले पनि सुुनेको भन्दै विरामी र चिकित्सक दुबै पक्षलाई मर्का नपर्ने गरि शुल्क तोक्न मन्त्रालयले सहजिकरण गर्नु पर्नेमा उनले जोड दिए । मन्त्रालयका समस्या समाधानकालागि आफूले कर्मचारीहरुलाई आवश्यक पर्ने समय दिन तयार रहेको बताउदै मन्त्री बस्नेतले मन्त्रालयको कामकाजमा ढिलाई नहोस भन्नका लागि आफूले आगन्तुकसँग भेटघाटको समय हरेक दिन साँझ ४ बजेपछि मात्र राख्न लागेको जानकारी दिए । उनले भने, अन्य भेटघाटले काममा बाधा नपरोस भन्ने हेतुले मैले आगन्तक भेटने समय साँझ ४ बजे पछि राख्दैछु ।
सूर्तिजन्य पदार्थमा दरको दायरा बढाएर भए पनि बिपन्न जनतालाई स्वास्थ्य उपचार दिनू पर्नेमा उनले जोड दिए । उनले भने, सूर्तिजन्य पदार्थमा कर बढाऔ र त्यसबाट संकलन भएको रकम वीर अस्पताल लगायतका विपन्नको उपचार हुने अस्पताललाई अनूदान दिऔ ।
सूर्तिजन्य पदार्थको करबाट उठ्ने रकम क्यान्सर लगायतका रोगमा मात्र खर्च गर्ने नियमलाई परिवर्तन गर्न आवश्यक भए प्रधानमन्त्रीसँग सल्लाह गरेर नियम परिवर्तन गर्ने मन्त्री बस्नेतले बताए । मन्त्री बस्नेतले मन्त्रालयमा गर्न सकिने सुधारका कामका बिषयमा आफुलाई लिखित रुपमा सुझाउ दिन कर्मचारीलाई आग्रह गरे । कमिसनका लागि अनावश्यक उपकरण किन्ने र तिनलाई प्रयोग नगरेर थन्क्याउने गलत प्रवृति अधिकांश सरकारी अस्पतालहरुमा बढिरहेको बताउदै मन्त्री बस्नेतले त्यो प्रवृति रोक्न कर्मचारीहरुलाई निर्देशन दिए । आउदो आर्थिक वर्षका लागि स्वास्थ्य मन्त्रालयको बजेट करिव ४० प्रतिसतले कटौती हुन लागेको सुन्नमा आएको बताउदै मन्त्री बस्नेतले बजेट बढाउनका लागि आफूले नेतृत्व गर्ने र सबै कर्मचारीले त्यसमा साथ दिनुपर्नेमा जोड दिए । कार्यक्रममा नीति योजना तथा अनुगमन महासाखाका उपसचिव लिला पौडेलले बजेट निर्माण र बजेट खर्चका बिषयमा प्रस्तुतिकरण गर्दै स्वास्थ्यमा बजेट घटेमा स्वास्थ्य विमा कार्यक्रम र विपन्नका लागि उपचार सेवा बढी प्रभावित हुने जानकारी दिए । कार्यक्रममा प्रशासन महासाखा, नीति, योजना तथा अनुगमन महासाखा, गुणस्तर मापन महासाखा, जनसंख्या व्यवस्थापन र स्वास्थ्य समुन्वय महासाखाका कर्मचारीहरु सहभागी दिए ।