चिकित्सक संघको राष्ट्रिय स्वास्थ्य सम्मेलन यही असोज १२ र १३ मा हुने

हेल्थ टुडे,
काठमाडौं, ७ असोज : नेपाल चिकित्सक संघले तेस्रो राष्ट्रिय स्वास्थ्य सम्मेलन ( थर्ड एनएमए नेसनल हेल्थ समिट– २०२३) यही असोज १२ र १३ गते राजधानीमा आयोजना गर्ने भएको छ ।
‘गुणस्तरीय स्वास्थ्य सेवाको प्रबद्र्धन : अवसर र चुनौति’ मुख्य सन्देशसहित सम्मेलन गर्न लागिएको संघले आईतबार पत्रकार सम्मेलन मार्फत जानकारी गराएको छ । संघका महासचिव डा. सन्जिव तिवारीले सम्मेलनमा विभिन्न छ वटा शीर्षकहरुमा नीतिगत विचार, विमर्श तथा बहस हुने जानकारी दिए ।
यस वर्षको सम्मेलन आयोजक कमिटिका अध्यक्ष प्रा. डा. चोपलाल भुसालले समिटमा नीतिगत विचार विर्मस मार्फत सैद्धान्तिक बहसका लागि दोस्रो राष्ट्रिय स्वास्थ्य शिखर सम्मेलनका उपलब्धि, चिकित्सा विज्ञानको विकासका लागि खोज, अनुसन्धान तथा नवप्रवर्तन, स्वास्थ्य सेवा प्रणालीको उन्नयनका लागि स्वास्थ्य अर्थशास्त्र, सुरक्षित स्वास्थ्य सेवा प्रवाहको सबलीकरण लगायतका बिषयमा बहस हुने बताए ।
चिकित्सक संघका पुर्व अध्यक्ष डा. लोचन कार्कीले संघ हडताल गर्ने संस्थामात्र होइन सरकारको थिंक ट्यांक पनि हो भन्ने कुरा बुझाउन पनि समिट आयोजना गर्न लागिएको बताए । समिटका नेपालको स्वास्थ्य प्रणालीमा भएका अवसर र चुनौतिका बिषयमा खुलेर विज्ञहरुबिच छलफल गरिने डा. कार्कीले जानकारी दिए ।
सम्मेलनमा बिषयविज्ञ, प्रबुद्धवर्ग, नेतृत्व तथा सरोकारवालाहरुको प्रत्यक्ष सहभागितामा नीतिगत विचार विर्मसमार्फत सैद्धान्तिक बहस हुने नेपाल चिकित्सक संघका अध्यक्ष डा. अनिलविक्रम कार्कीले जानकारी दिए। उनले गुणस्तरीय स्वास्थ्य सेवा सबैको पहूचमा पुर्याउन सम्मेलनले पैरवी गर्ने समेत जानकारी दिए।