फर्मा कन्क्लेभ २०२३ सम्पन्न

हेल्थ टुडे,
काठमाडौं, २५ असोज : नेपाली औषधी उद्योगको वर्तमान अवस्थाको चित्रण गर्न र भावी कार्ययोजनाको खाका कोर्ने उद्देश्यले नेपाल औषधी उत्पादन संघ (एप्पोन) र औषधी व्यवस्था विभागले संयुक्त रुपमा विहीवार राजधानीको याक एण्ड यति होटलमा आयोजना गरेको फर्मा कन्क्लेभ २०२३ सम्पन्न भएको छ । कन्क्लेभको उद्देश्य माथि प्रकाश पादै नेपाल औषधि उत्पादन संघ (एप्पोन) का अध्यक्ष प्रज्ज्वल जंग पाण्डेले ओषधी उद्योगसंग सम्बन्धी उत्पादक, व्यवसायी, निति निर्माण र अनुसन्धान कर्ता एकै ठाउँमा भेला भएर औषधीको विकासमा साझा अजेण्डामा छलफल गरेर नेपालमा पहिलो पटक फर्मा कन्क्लेभ आयोजना गरिएको जानकारी दिए ।
नेपाल औषधी उद्योग ५० प्रतिशत औषधी उत्पादनमा आत्मनिर्भर रहेको बताउदै अध्यक्ष पाण्डेले औषधीमा पुरै आत्मनिर्भर हुन कन्क्लेभले नयाँ दिशा निर्देश गर्ने दाबी गरे । औषधी व्यवस्था विभागका महानिर्देशक नारायण ढकालले फर्मा कन्क्लेभले नेपाललाई भविश्यमा औषधीमा आत्मनिर्भर हुने अभियानमा इट्टा थप्ने काम गर्ने बताए । ५० प्रतिशत औषधी उत्पादन स्वदेशमै भइरहेको अवस्थामा त्यो संख्या बढाउन धेरै मेहनत गर्नुपर्नेमा ढकालले जोड दिए । नेपाली औषधी उद्योगहरुले अर्को फड्को मार्नु पर्ने बेला आएको बताउदै महानिर्देशक ढकालले सिर्जनात्मक ढंगले अगाडि बढ्नु पर्नेमा जोड दिए । कार्यक्रममा बंगालादेशको ढाका विद्यालयको फार्मेसी विषयमा डिन डा.सितेष सी बचरले बंगलादेश ९७ प्रतिशत औषधीमा आत्मनिर्भर भएको बताउदै नेपालले पनि आत्मनिर्भरताका बाटोमा आफूलाई हिडाउनु आवश्यक रहेको बताए । भारतबाट आएका फार्मेसी विज्ञ डा.निकुञ्ज पटेलले नेपाली औषधीले फट्को मार्ने हो भने विदेशमा औषधी निर्यात गर्नै पर्नेमा जोड दिए । कार्यक्रममा विभिन्न सेसनमा विज्ञहरुका बिच प्यानल डिस्कसन गराइएको थियो । कन्क्लेभ सफल भएको एप्पोनका महासचिव विप्लव अधिकारीले जानकारी दिए ।