स्वास्थ्य बीमा पूरै फेल भएको छैन, सुधार्न सकिन्छ : डा. लोहनी

हेल्थ टुडे,
काठमाडौं, २३ चैत : स्वास्थ्य बीमा बोर्डका अध्यक्ष डा. गुणराज लोहनीले स्वास्थ्य बीमा कार्यक्रम पूरै फेल नभएको दाबी गर्दै यसलाई सुधार गर्न सकिने बताएका छन् । आठौं स्वास्थ्य बीमा दिवसको पुर्व सन्ध्यामा शुक्रबार राजधानीमा आयोजना गरिएको पत्रकार सम्मेलनमा बोर्डका अध्यक्ष डा. लोहनीले स्वास्थ्य बीमामा थुप्रै समस्या भएको स्विकार गर्दै सुधार्नै नसकिने भने नभएको बताए । स्वास्थ्य बीमा कार्यक्रम सञ्चालन गरेका अस्पतालहरुले सम्झौता अनुसार सेवा उपलब्ध नगराए नविकरण रोक्नेसम्मको कारवाही गर्न सरकारलाई सिफारिस गरिने दावी गर्दै डा.लोहनीले विमितको संख्या बढाउन छिट्टै अनलाईन मार्फत घरमै बसीबसी स्वास्थ्य बीमा गर्न सकिने व्यवस्था गर्न लागिएको जानकारी दिए । डा. लोहनीले भने, ‘स्वास्थ्य बीमामा अर्को वर्ष एआईको प्रयोग समेत गर्ने छौ । ’
बीमा कार्यक्रम पन्चड भएको टायर टालेर गाडी चलाए जस्तै तरिकाले अगाडि बढिरहेको बताउदै सरकारले चाडै यसका बिषयमा ठोस कदम चाल्ने विश्वास व्यक्त गरे । पत्रकार सम्मेलनमा बीमा बोर्डका कार्यकारी निर्देशक दामोदर बसौलाले देशका ७५२ पालिकामा कार्यक्रम सुरु भइसकेको जानकारी दिदै स्वास्थ्य बीमा दिवसको अवसरमा चैत २५ गते बाकी रहेको बुढानिलकण्ठ नगरपालिकाका पनि सेवा सुभारम्भ भएको घोषणा गरिने बताए ।
स्वास्थ्य बीमा बोर्डका सदस्य डा. मुक्तीराम श्रेष्ठले स्वास्थ्य बीमाका बिषयमा अजmै पनि जनमानसमा चेतना अभाव रहेको बताए । स्वास्थ्य बीमाको विकल्प स्वास्थ्य बीमा नै भएको बताउदै डा. श्रेष्ठले सबैको सकारात्मक सोचले कार्यक्रम सफल हुनेमा जोड दिए । स्वास्थ्य बीमा बोर्डको तथ्यांक अनुसार अहिलेसम्म कुल जनसंख्याको २६.५४ प्रतिसतले स्वास्थ्य बीमा गराएका छन् । कुल विमित मध्ये सेवा लिनेको संख्या ४७ प्रतिसत रहेको छ भने ६२ प्रतिसतले बीमा नविकरण गराएका छन् ।