बाढी प्रभावितका लागि नेपाल चिकित्सक संघको स्वास्थ्य सिविर तथा राहत वितरण

हेल्थ टुडे,
काठमाडौं, २० असोज : नेपाल चिकित्सक संघले बाढी प्रभावितहरुका लागि काठमाडौंको बल्खुमा स्वास्थ्य सिविर तथा राहत वितरण कार्यक्रम आयोजना गरेको छ । अमेरिका मेडिकल फाउण्डेसनको सहयोगमा संघले काठमाडौं महानगरपालिका वडा नम्बर १४ स्थित बल्खु पुल नजिक पेट्रोल पम्पमा शनिबार र आईतबार गरि दुई दिन स्वास्थ्य सिविर र राहत वितरण गरिएको संघका महासचिव डा.संजीव तिवारीले जानकारी दिएका छन् । सिविरमा सयौं बाढी पिडितको स्वास्थ्य परिक्षण गरिनुका साथै उनीहरुलाई आवश्यक औषधि निशुल्क रुपमा वितरण गरिएको थियो ।
यसका साथै विभिन्न खाद्यान सहितका राहत सामग्री वितरण समेत गरिएको थियो । कार्यक्रममा चिकित्सक संघका पदाधिकारी, चिकित्सक, स्वास्थ्यकर्मी र औषधि व्यवसायीको पनि सहभागिता रहेको थियो । चिकित्सक संघले बेला बेलामा यस प्रकारका स्वास्थ्य सिविर आयोजना गर्दै आइरहेको महासचिव डा. तिवारीले बताए ।