मंसिर २९ र ३० गते राजधानीमा द हिमालयन अन्तर्राराष्ट्रिय प्रत्यारोपण सम्मेलन हुने

हेल्थ टुडे,
काठमाडौं, २५ मंसिर : यही मंसिर २९ र ३० गते राजधानीमा द हिमालयन अन्तर्राराष्ट्रिय प्रत्यारोपण सम्मेलन हुने भएको छ । नेपालमा अंग प्रत्यारोपण गर्ने सोसाइटीहरुको संयुक्त आयोजनामा उक्त सम्मेलन आयोजना हुन लागेको हो । विकाशोन्मुख देशहरुमा अंगदान प्रर्वद्वन गर्नु भन्ने नाराका साथ आयोजना हुने उक्त सम्मेलनमा अमेरिका, भारत, जापान, भारत, बेलायत, नेदरल्याण्ड गरि १९ जना विज्ञहरुले २६ वटा कार्यपत्र प्रस्तुत गर्ने छन् ।
सम्मेलनका विषयमा जानकारी दिन मंगलबार राजधानीमा आयोजना गरिएको पत्रकार सम्मेलनमा आयोजक कमिटि नेपाल प्रत्यारोपण समुदायका अध्यक्ष डा. पुकारचन्द्र श्रेष्ठले सम्मेलनमा विभिन्न देशका प्रत्यारोपण विज्ञहरु एकै थलोमा बसेर अनुभव आदान प्रदान गर्ने देखि प्रत्यारोपणको विकासका लागि मन्थन गर्ने भएकाले यसको ठूलो महत्व रहेको बताए । सम्मेलनको बैज्ञानिक समितिका अध्यक्ष डा. ऋषिकुमार काफ्लेले अंग प्रत्यारोपणको क्षेत्रमा काम गर्ने दुई वटा सोसाइटी मिलेर संयुक्त रुपमा सम्मेलन आयोजना गर्न लागिएकोले यसले सकारात्मक सन्देश दिने र सम्मेलन उपलब्धिमूलक हुनेमा जोड दिए ।
आयोजक समितिकी सचिव डा. कल्पना श्रेष्ठले यस किसिमका सम्मेलनबाट प्रत्यारोपणका क्षेत्रमा हामीले गरेका उपलब्धिहरुलाई विदेशसम्म पुर्याउने र विदेशमा भइरहेका प्रविधिका विषयमा हामीले धेरै कुरा सिक्ने मौका मिल्ने बताइन । नयाँ बानेश्वरस्थित एभरेष्ट होटेलमा आयोजना हुने सम्मेलनमा करिव ३०० जनाको सहभागिता रहने आयोजकले जनाएको छ ।