एघारौं स्वास्थ्य तथा जनसंख्या वैज्ञानिकहरुको शिखर सम्मेलन राजधानीमा भोलीबाट सुरु

हेल्थ टुडे,

काठमाडौँ, २७ चैत : नेपाल स्वास्थ्य अनुसन्धान परिषद्को आफ्नो स्थापना दिवसको अवसरमा आयोजना गर्दैै आइरहेको स्वास्थ्य तथा जनसंख्या वैज्ञानिकहरुको शिखर सम्मेलन चैत २८ गतेबाट राजधानीको सोल्टी होटेलमा सुरु हुदैछ । एघारौ पटक हुन लागेको उक्त सम्मेलनको शिक्षा, विज्ञान तथा प्रविधि मन्त्री विद्या भट्टराईले उदघाटन गर्ने कार्यक्रम छ । तिन दिनसम्म चल्ने सम्मेलनमा देश र विदेशका गरि करिव एक हजार स्वास्थ्य तथा जनसंख्या वैज्ञानिकहरुको सहभागिता रहने छ । परिषद्ले बुधबार पत्रकार सम्मेलन गर्दै सम्मेलनका बिषयमा जानकारी दिएको हो ।
सम्मेलनको यस वर्षको मुख्य नारा “स्वास्थ्य, जलवायु र जनसंख्यामा परिवर्तनः दिगो र समावेशी भविष्यको लागि उत्थानशील स्वास्थ्य प्रणाली” रहेको छ ।
. पत्रकार सम्मेलनमा बमेल्दै परिषद्का कार्यकारी सदस्य सचिव डा प्रमोद जोशीले सम्मेलनका्े सम्पूर्ण तयारी पुरा भएको जानकारी दिए । डा. जोशीका अनुसार सम्मेलनमा नेपालसहित भारत, चीन, बेलायत, डेनमार्क, स्विजरल्यान्ड, जर्मनी, अमेरिका लगायत देशका १०० भन्दा बढी अन्तर्राष्ट्रिय विज्ञहरूले भौतिक रुपमा तथा भर्चुअल रुपमा सहभागि हुने छन् । डा. जोशीले भने, “ स्वास्थ्य र जनसंख्यामा आधारित अनुसन्धान प्रवद्र्धन गर्नु, प्रमाणमा आधारित नीतिनिर्माण प्रक्रिया सुदृढ गर्नु, र वैज्ञानिक अनुसन्धानकर्ता तथा नीतिनिर्माताबीच सहकार्यलाई बलियो बनाउनु सम्मेलनको उद्देश्य रहेको छ । ”
यसपटकको सम्मेलन जलवायु परिवर्तनका कारण उत्पन्न स्वास्थ्य चुनौतीहरू, स्वास्थ्य प्रणालीको उत्थानशीलता र स्वास्थ्य सेवामा समान पहुँचको सुनिश्चितता लगायतका समसामयिक विषयवस्तुमा केन्द्रित हुनेसमेत डा. जोशीले बताए । परिषद्का प्रमुख अनुसन्धान अधिकृत डा. मेघनाथ घिमालले स्वास्थ्य बीमा, दक्ष स्वास्थ्यकर्मीको पलायन, मानसिक रोग, सर्ने–नसर्ने रोग तथा अनुसन्धान नियमन लगायत विषयमा सम्मेलनमा विशेष छलफल हुने जानकारी दिए ।
सम्मेलनलाई पारदर्शी बनाउन स्टेरिङ कमिटि, सेन्टेफिक कमिटि, अर्गनाइजिङ कमिटि तथा अवार्ड सेलेक्सन सब कमिटि गठन गरिएको परिषद्ले जानकारी दिएको छ । सम्मेलनका लागि १४६ वटा मौखिक र १३० वटा पोष्टर प्रस्तुतिकरण प्राप्त भएका छन् । डा. धिमालले त्यसमध्ये ८७ वटा मौखिक र ११५ वटा पोष्टर प्रस्तुतिकरणका लागि छनौट भएको जानकारी दिए । अघिल्ला वर्ष जस्तै परिषद्ले यसपटक पनि विभिन्न विधाका गरि १४ वटा अवार्ड वितरण गर्ने भएको छ । सम्मेलनमा प्रमुख वक्ताको रुपमा योजना आयोगका उपाध्यक्ष र विश्व स्वास्थ्य संगठनका प्रतिनिधि रहने छन् ।