सुर्तीजन्य पदार्थ विरुद्घको एसिया प्यासिफिक सम्मेलन इन्डोनेसियाको बोगोरमा

पदमराज जोशी,

बोगोर, इन्डोनेसिया ७ असोज:  सुर्तीजन्य पदार्थ र नसर्ने रोगहरूविरुद्घ एसिया प्रशान्त क्षेत्रका नगरहरूको दबाब समूह ‘अलाइन्स एसिया प्यासिफिक सिटिज् अलाइन्स फर टोवाको कन्ट्रोल एन्ड नन्कम्युनिकेबल डिजिज’ एपी क्याटको चौथो सम्मेलन सेप्टेम्बर २५ देखि इन्डोनेसियाको बोगोरमा सुरु हँुदैछ । एपी क्याटका नामले चिनिने यो सम्मेलनमा विश्व फोक्सो दिवसको अवसर पारेर सेप्टेम्बर २५ देखि सुरु हुन लागेको हो । सम्मेलन दुई दिनसम्म चल्नेछ ।

इन्डोनेसियाको स्वास्थ्य मन्त्रालय, एपी क्याट, द युनियन, ‘इन्टरनेसनल युनियन अगेनेस्ट टीबी एन्ड लङ डिजिज’ र बोगोर सिटीको संयुक्त आयोजनामा सम्मेलन हुन लागेको हो । सम्मेलनमा एसिया प्रशान्त क्षेत्रका नेपाललगायत भारत, बंगलादेश, फिलिपिन्स, सिंगापुर, कम्बोडिया, मलेसिया, भियतनाम, इन्डोनेसिया, म्यान्मारलगायत १२ देशका सुर्तीजन्य पदार्थ र नसर्ने रोगविरुद्घ लागिरहेका नेता र अभियन्ताहरूले भाग लिँदै छन् । सम्मेलनमा भाग लिने अधिकांश सहभागीहरू बोगोर पुगिसकेका छन् । एपी क्याटका सहअध्यक्ष एवं बोगोरका मेयर डा बिमा अर्या सुगार्तोले सम्मेलनमा १२ देशका ४० नगरका करिव ३ सय भन्दा बढी सुर्तीजन्य पदार्थ र नसर्ने रोगविरुद्घको अभियानमा संलग्न एसिया प्यासिफिक क्षेत्रका सांसद, मेयर, स्थानीय नेता, सरकारी अधिकारी, अभियन्ता र पत्रकारहरूले भाग लिने जानकारी दिएका छन् ।

सुर्तीजन्य पदार्थ र नसर्ने रोगविरुद्घ एकजुट भएर स्वस्थ्य समाज निर्माण गर्ने उद्देश्यका साथ एसिया प्रशान्त क्षेत्रका नगरहरूको ‘अलाइन्स’ एपी क्याटको स्थापना सन् २०१६ मा भएको हो । हरेक वर्ष एपी क्याटको सम्मेलन विभिन्न नगरहरूमा हँुदै आइरहेको छ । इन्डोनेसियाको बोगोर सिटीले सार्वजनिक स्थानमा सुर्तीजन्य पदार्थको सेवनलाई दण्डनीय बनाएको र यससम्बन्धी विज्ञापन प्रकाशन प्रसारणमा रोक लगाएर उत्कृष्ट कार्य गरेकाले यस पटकको चौथो सम्मेलन बोगोरमा गर्न लागिएको आयोजकले विज्ञप्ति मार्फत जानकारी दिएको छ ।

सम्मेलनमा नेपालका तर्फबाट पूर्वस्वास्थ्य मन्त्री एवं सांसद खगराज अधिकारी, प्रतिनिधि सभा महिला तथा समाज कल्याण समितिकी सभापति एवं सभासद् नीरुदेवी पाल, भरतपुर महानगरपालिकाका मेयर रेणु दाहाल, स्वास्थ्य तथा जनसंख्या मन्त्रालय कानून साखाका उपसचिव पुस्कर नेपाल, एक्सन नेपालका अध्यक्ष आनन्दबहादुर चन्दसहितका अधिकारी र स्वास्थ्य पत्रकाररूले भाग लिँँदैछन् । सम्मेलनमा सांसद, मेयरहरू, स्थानीय नेता, अभियन्ता, सञ्चारकर्मी र सरोकारवालाहरूले सुर्तीजन्य पदार्थ र नसर्ने रोगविरुद्घको अभियानमा भएका प्रगति, आफ्ना अनुभव आदानप्रदान र यसविरुद्घ बनेका कानुन कार्यान्वयनका लागि सरकारलाई दबाब दिने र समाधान खोज्ने विषयमा व्यापक छलफल हुने द युनियन एसिया प्यासिफिकका उपक्षेत्रीय निर्देशक डा.तारासिंह बमले जानकारी दिएका छन् । सम्मेलनलाई बढी प्रभावकारी बनाउन छलफल र अन्तरक्रियालाई बढी महत्व दिइने डा.बमले प्रष्ठ पारेका छन । पछिल्ला वर्षहरुमा नसर्ने रोगहरुको संक्रमण बढ्दै जानुको प्रमुख कारक तत्वको रुपमा सूर्तिजन्य पदार्थको सेवन भएकाले यसको उत्पादन, उपभोग र बिक्री बितरणमा रोक लगाउनु पर्ने एपी क्याटले बताउदै आएको छ ।