नेपालमा संक्रमितको संख्या ३० पुग्यो, एकै दिन १४ जनामा कोरोना पुष्टि

हेल्थ टुडे,
काठमाडौं, ५ बैसाख : नेपालमा कोरोना भाइरस संक्रमितको संख्या ३० पुगेको छ । शुक्रबार एकै दिन १४ जनामा कोरोना संक्रमण देखिएको स्वास्थ्य तथा जनसंख्या मन्त्रालयले जनाएको छ । प्रयोगशाला परिक्षणबाट उनीहरुमा कोरोना संक्रमण पुष्टि भएको हो । जसमध्ये १२ जना उदयपुरमा रहेका हुन् भने दुईजना चितवनका रहेका छन् ।
उदयपुरमा कोरोना पुष्टि भएका १२ जना पुरुष हुन्। मन्त्रालयका अनुसार कोरोना पुष्टि हुने पुरुषमा २०, २२, २५, २६, ३४ र ४० वर्षीय पुरुष एक(एकजना, २९ वर्षीय दुईजना र २८ वर्षीय पुरुष चारजना रहेका छन् । कोरोना पुष्टि हुने अधिकांश भारतीय नागरिक हुन्। त्यसैगरी चितवमा २७ वर्षीय र ६३ वर्षीया दुईजनामा कोरोना देखिएको हो। उदयपुरका नयाँ संक्रमित सबैलाई विराटनगरस्थित कोरोना अस्पताल ल्याइएको छ ।
यसअघि नेपालमा १६ जनामा मात्र कोरोना पुष्टि भएको थियो। जसमध्ये एकजना निको भएर डिस्चार्ज भएका छन् । अन्य १५ जनाको विभिन्न अस्पतालमा उपचार भइराखेको छ । मन्त्रालयका अनुसार पाँच जनाको कैलालीको धनगढीस्थित सेती प्रादेशिक अस्पतालमा उपचार भइराखेको छ भने चार जनाको वीरगन्जस्थित नारायणी अस्पतालमा उपचार भइराखेको छ । अन्य ६ जनाको भने शुक्रराज ट्रपिकल तथा सरुवारोग अस्पताल, टेकु, पाटन अस्पताल, लगनखेल र धौलागिरी अस्पताल, बागलुङमा दुईदुई जनाको उपचार हुँदैछ ।