आयुर्वेदमा दातृनिकायको सहयोग शून्य

हेल्थ टुडे,
काठमाडौं, २१ मंसिर : नेपालको स्वास्थ्य क्षेत्रमा दातृ निकायको सहयोग उल्लेखनिय भएपनि आयुर्वेदको विकास र विस्तारमा भने उनीहरुको सहयोग शून्य प्राय नै छ । विश्व स्वास्थ्य संगठनबाहेकका दातृ निकायले आधुनिक चिकित्सा प्रणालीको सुधारका लागि आर्थिक र प्राविधिक सहयोग गरिरहेका भए पनि आयुर्वेदको विकासका लागि सहयोग गर्न रुची देखाएका छैनन् ।
नेपालमा स्वास्थ्य क्षेत्रको कुल बजेटको ४० प्रतिसत जति विदेशी दातृ निकायले सहयोग गर्दै आईरहेका छन । आयुर्वेद तथा बैकल्पिक चिकित्सा विभागका महानिर्देशक डा.बाशुदेब उपाध्यायले आयुर्बेदको विकास र बिस्तारमा विश्व स्वास्थ्य संगठन बाहेक कुनै पनि दातृ निकायले सहयोग नगरेको बताए । सरकारले समेत आयुर्वेदका लागि एकदमै न्यून बजेट विनियोजन गर्ने गरेकाले आवश्यकता अनुसार यो क्षेत्रको विकास र बिस्तार हसन नसकेको डा. उपाध्यायले जानकारी दिए ।
सरकारले आयुर्वेद तथा वैकल्पिक चिकित्सा विभागका लागि यो आर्थिक वर्षमा ४ करोड ७३ लाख रुपैया बजेट विनियोजन गरेको उनले बताए । आयुर्बेद क्षेत्रमा १ सय ४० जना विज्ञ रहेको बताउदै विभाग मातहतका अस्पतालहरुले गत बर्ष १३ लाख जनतालाई उपचार सेवा प्रदान गरेको डा. उपाध्ययले जानकारी दिए ।