हेल्थ टुडे,
भक्तपुर, ९ भदौ : शहीद धर्मभक्त राष्ट्रिय प्रत्यारोपण केन्द्र, भक्तपुरमा कलेजो प्रत्यारोपण सेवाले निरन्तरता पाएको छ। केन्द्रले ३८ औं कलेजो प्रत्यारोपण सफलतापूर्वक सम्पन्न गरेको जनाएको छ।
धनुषाका ४८ वर्षीय सुरेन्द्र साहको गत साउन २७ गते कलेजो प्रत्यारोपण गरिएको थियो। उनकी ३५ वर्षीया श्रीमती कृष्णदेवी साहले आफ्नो आधा कलेजो श्रीमान्लाई दान गरेकी थिइन्। प्रत्यारोपणको ११औँ दिन कृष्णदेवी र १२औँ दिन सुरेन्द्रलाई सफलतापूर्वक डिस्चार्ज गरिएको केन्द्रले जनाएको छ।
कलेजो प्रत्यारोपण शल्य चिकित्सक डा. रामबाबु साहको नेतृत्वमा प्रत्यारोपण सम्पन्न भएको हो। प्रत्यारोपणमा शल्यक्रिया, एनेस्थेसिया तथा क्रिटिकल केयर, रेडियोलोजी, कार्डियोलोजी, प्याथोलोजी, ग्यास्ट्रोइन्टरोलोजी, पल्मोनोलोजी, नर्सिङ, ओटी व्यवस्थापन, फार्मेसी, डाइटिसियन र फिजियोथेरापी लगायतका विभिन्न विभागका विशेषज्ञ तथा स्वास्थ्यकर्मी सहभागी थिए।
केन्द्रका अनुसार १४ वर्षको अवधिमा हालसम्म १ हजार ६७९ जनाको मिर्गौला र ३९ जनाको कलेजो प्रत्यारोपण सम्पन्न भइसकेको छ। आफ्नै भवन र पर्याप्त उपयुक्त जग्गाको अभावका बाबजुद केन्द्रले प्रत्यारोपण सेवामा उल्लेखनीय प्रगति गर्दै आएको छ।
केन्द्रका कार्यकारी निर्देशक डा. कल्पना कुमारी श्रेष्ठका अनुसार नेपालमा हुने कुल अंग प्रत्यारोपणमध्ये करिब दुई तिहाइ प्रत्यारोपण केन्द्रले नै गर्दै आएको छ। सीमित भौतिक पूर्वाधारका बीच पनि दक्ष जनशक्ति र बहुविषयगत टोलीको समन्वयमा विश्वस्तरीय प्रत्यारोपण सेवा उपलब्ध गराउने प्रयास भइरहेको उहाँले बताउनुभयो।
नवीनतम कलेजो प्रत्यारोपणमा बिरामी र दुवै पक्षको स्वास्थ्य अवस्था राम्रो रहनु केन्द्रका लागि महत्वपूर्ण उपलब्धि भएको केन्द्रले जनाएको छ।
Leave a Reply