अनियमितताको आरोप लगाउनेलाई प्रमाणित गर्न चुनौती

हेल्थ टुडे,
काठमाडौं, १८ जेठः वीर अस्पताल सरसफाइ र रंगरोगनमा सक्रिय सीताराम कट्टेल धुर्मुसले अनियमितताको आरोप लगाउनेलाई प्रमाणित गर्न चुनौती दिएका छन् । वीर अस्पतालको रंगरोगनका विषयमा जानकारी दिन आयोजित अन्तरक्रिया कार्यक्रममा बोल्दै उनले प्रमाणित भए आफू जुनसुकै सजाय भोग्न तयार रहेको बताएका छन् ।
यदि एक रुपैयाँ तलमाथि गरेको प्रमाणित भए त्यसको एक दिन पनि म यो धर्तिमा नरहने उनले बताएका छन । उनी आफू कलाकारितामा समेत सफल रहेतापनि सामाजिक कार्यमा सहभागी हुने र केही गर्ने सोचले यो क्षेत्रमा आएको बताएका छन । उनले पेशा त्यागेर राष्ट्रका लागि काम गरिरहेका बताए र अब आफ्नो पाइला नराकिने बताए त्यसका लागि जसले जे भने नि जे बुझे नि कदम नरोकिने बताएका छन ।
वीर अस्पताल रंगरोगन गरिरहँदा अस्पतालको नाममा चन्दा उठाएको आरोपको खण्डन गरे । उनले भने, ‘वीर अस्पतालका नाममा चन्दा उठाएका छैनौं । हामीले वीर अस्पताल सफा गरिरहेका छौं । यो अभियानमा जोडिन चाहनेको सहयोग लिइरहेका छौं ।’
उनले स्वस्फुर्त सहयोग गर्नेहरुबाट हालसम्म १४ लाख ६४ हजार ८ सय ३५ रुपैयाँ संकलन भएको बताए । आफूले ८२ जना पेन्टरको नेतृत्व गरेर रातदिन खटेर काम गरिरहेको अवगत गराए । उनले हालसम्म ४८ लाख ६४ हजार १ सय ४४ बराबरको काम गरिसकेको जानकारी गराए ।
स्वास्थ्य राज्यमन्त्री पद्मा अर्यालले वैशाख २३ गते वीर अस्पतालबाट देशव्यापी सरकारी अस्पताल सरसफाई अभियानको घोषणा गरेकी थिइन् । उक्त अभियानमा धुर्मुस सुन्तली, खेम्स क्लिनिङका खेम शर्मा लगायतका अभियान्ता जोडिएका छन् ।
भित्री सुधार थाल्ने राज्यमन्त्री अर्यालको घोषणा
स्वास्थ्य राज्यमन्त्री पद्मा अर्यालले आफूले थालेको सरसफाई अभियानलाई सघाउने धुर्मुस र खेम शर्माको प्रशंसा गर्नुभएको छ । वीरको आवरण सफा हुँदै गएको बताउँदै भित्री रुप (प्रणाली) पनि परिवर्तन गर्नुपर्ने बताउनुभयो । अवको १५ दिनमा वीर अस्पताल सफा र सुन्दर देखिने बताउँदै त्यही अवस्था देशभरका अस्पतालको देख्न चाहेको बताउनुभयो ।
उहाँले अस्पतालको प्रणाली सुधार पनि थालिने जानकारी दिनुभयो । सरकारी अस्पतालमा सेवा प्रवाहमा रहेका बेथितीलाई पनि यसैगरी सुधार्नुपर्ने उनको धारणा रहेको बताउदै अस्पतालको भित्री कुरामा समेत सुधार गरेर जनतालाई अनुभूत हुने गरी सुधार ल्याउँने जानकारी दिनुभयो ।
१२८ वर्ष पुरानो वीरको संरचना बदल्न नसकिएपनि प्रणाली सुधार अवश्य गर्न सकिने र वीरलाई डिजिटल प्रणालीमा लैजाने तयारी पनि आफूले गरिरहेको समेत मन्त्री अर्यालले जनकारी दिनुभयो ।