एचआईभीमा आफु खुशी रिसर्च गर्न एनजिओ र आईएनजिओलाई रोक 

हेल्थ टुडे,

काठमाडौ, २१ मंसिर :  एचआईभी र एड्सका क्षेत्रका कार्यरत एनजिओ र आईएनजीओहरुले अब आफु खुशी अध्ययन, अनुसन्धान र सर्वेक्षण गर्न नपाउने भएका छन् । आफु खुशी अध्ययन, अनुसन्धान र सर्वेक्षण गरेर आफु अनुकुल नतिजा सार्वजनिक गर्न थालेपछि स्वास्थ्य तथा जनसंख्या मन्त्रालयले उनीहरुलाई त्यसो गर्न रोक लगाएको हो । अब एचआईभी र एड्सका क्षेत्रका हुने कुनै पनि अध्ययन, अनुसन्धान र सर्वेक्षण स्वास्थ्य अनुसन्धान परिषद्को अनुमती र संलग्नतामा मात्र हुने छ ।

स्वास्थ्य तथा जनसंख्या मन्त्रालयका निमित्त सचिव डा. शुशिल प्याकुरेलले एचआईभी र एड्सका क्षेत्रमा हुने अध्ययन, अनुसन्धान र सर्वेक्षणको विश्वसनियता र सरकारको स्वामित्व स्थापित गर्न स्वास्थ्य अनुसन्धान परिषद्को सहमती हुनु पर्ने बताए । उनले भने, ‘यसका बिषयमा तत्काल कदम चाल्न एड्स तथा यौन रोग नियन्त्रण केन्द्रलाई निर्देशन दिइसकेको छु । ’  स्वास्थ्य क्षेत्रमा हुने अध्ययन, अनुसन्धानको आधिकारिक निकाय स्वास्थ्य अनुसन्धान परिषद् भएकाले उसको संलग्नता आवश्यक देखिएकोले छिटोभन्दा छिटो कार्यविधि बनाएर लागु गर्न केन्द्रका निर्देशक डा. तारा पोखरेललाई मन्त्रालयले निर्देशन दिइसकेको स्वास्थ्य तथा जनसंख्या मन्त्रीका सल्लाहकार डा. केके राईले बताए । एचआईभी संक्रमितको संख्या, संक्रमण दर, जोखिममा रहेका समूह,एड्सका कारण हुने मृत्यु, औषधि सेवनक्रताको संख्या, यौनकर्मीको संख्या लगायतका अधिकांश अध्ययन, अनुसन्धान र सर्वेक्षण एनजिओ र आईएनजिओले गर्ने गरेका छन् ।

आफु खुशी र आफ्नो अनुकुल नतिजा ल्याएपछि त्यसको सार्वजनिक गर्न मात्र एड्स तथा यौन रोग नियन्त्रण केन्द्रका अधिकारीलाई सहभागी गराइने प्रचलन छ । सरकारी अधिकारीले पनि भत्ता र भ्रमणको लोभमा साक्षी बस्ने र त्यही तथ्यांकलाई आधिकारिक मान्दै आइरहेको केन्द्रका अधिकारी बताउछन् । स्वास्थ्य तथा जनसंख्या मन्त्रालयको तथ्यांक अनुसार नेपालमा ३१ हजार २० एचआईभी संक्रमित रहेको अनुमान छ ।