हरेक स्थानिय तहसम्म आयुर्वेदको दरबन्दी सिर्जना गर्न माग

हेल्थ टुडे,

काठमाडौं, १५ पुष : हरेक स्थानिय तहसम्म कम्तिमा पनि एक जना आयुर्वेद तथा वैकपल्पिक चिकित्सा स्वास्थ्यकर्मीको दरबन्दी सिर्जना गर्न सरोकारवालाले सरकारसँग माग गरेको छ । उनीहरुले स्वास्थ्य तथा जनसंख्या मन्त्री उपेन्द्र यादव र राज्यमन्त्री डा. सुरेन्द्र यादवलाई छुट्टा छुट्टै भेटेर आफ्ना माग अगाडि सारेका हुन । आयुर्वेद स्वास्थ्यकर्मी समाज, नेपाल आयुर्वेद चिकित्सक संघ र सिभिल आयुर्वेद संघले स्वास्थ्यको वर्तमान पुनसंरचित दरबन्दीमा आयुर्वेदको दरवन्दीमा आँखा चिम्लिएकोमा उनीहरुको आपत्ती रहेको छ ।

उनीहरुले स्वास्थ्य मन्त्री र स्वास्थ्य राज्यमन्त्रीलाई ज्ञापनपत्र बुझाएर माग पुरा हुनु पर्ने माग गरेका छन् । उनीहरुले हरेक गाउपालिका र नगरपालिकामा कम्तिमा पनि एक जना आयुर्वेद स्वास्थ्यकर्मी, उपमहानगरपालिका र महानगरपालिकामा दुई जना आयुर्वेद स्वास्थ्यकर्मीको दरबन्दी हुनु पर्ने माग उनीहरुको छ । देशभरिका ७५३ स्थानियतहमध्ये २५४ तहमा मात्र आयुर्वेदको दरबन्दी रहेको जानकारी दिदै ४ सय ९९ वटा स्थानिय तहमा पनि अनिवार्य रुपमा कम्तिमा एक एक वटा दरबन्दी सिर्जना हुनु पर्ने उनीहरुको माग छ । त्यसका साथै हरेक प्रदेशका समाजिक विकास मन्त्रालयमा कटौती भएको आयुर्वेदको दरबन्दी थप्नु पर्ने र स्वास्थ्य मन्त्रालयमा ११ औं तहको आयुर्वेद विज्ञको दरबन्दी सिर्जना हुनु पर्ने माग उनीहरुको छ ।