१५ जिल्लामा हात्तीपाइले रोगविरुद्धको औषधि सेवन अभियान सुरु हुँदै,७८ लाखलाई औषधि खुवाउने लक्ष्य

काठमाडौ,१२ फागुन । सरकारले यही फागुन १५ गतेदेखि हात्तिपाइले रोगको जोखिम रहेका मुलुकका १५ जिल्लामा हात्तिपाइले रोगबिरुद्धको औषधि सेवन अभियान सुरु गर्दैछ । इपिडिमियोलोजी तथा रोग नियन्त्रण महाशाखाले यही फागुन १५ गतेदेखि हात्तीपाइले रोगविरुद्धको औषधि खुवाउने जनाएको हो ।

महाशाखाले फागुन १५ देखि पाचँथर, इलाम, झापा, मोरङ, बारा, लमजुङ, पर्वत, बागलुङ, कपिलबस्तु, दाङ, बाँके, बर्दिया, कैलाली र कञ्चनपुर गरी १५ जिल्लाका ७८ लाख ४९ हजारलाई औषधि खुवाउने लक्ष्य लिएको जनाएको छ । कार्यक्रमका लागि ६ हजार २ सय ५ जना स्वास्थ्यकर्मी परिचालन गरिने इपिडिमियोलोजी तथा रोग नियन्त्रण महाशाखाले जनाएको छ ।

सरकारले यस वर्षको कार्यक्रमलाई २० करोड ६० लाख ७० हजार रकम विनियोजन गरेको छ । महाशाखाले देशभरका ३४ अस्पतालमा ४ हजार १ सय ७० जनाको दरले हाईड्रोशिल सर्जरीको लागि बजेट छुट्याईएको र अहिलेसम्म ६ हजार तीन सय २६ जना हाइड्रोशिलका बिरामीको निःशुल्क शल्यक्रिया भैसकेको जनाएको छ ।

हातीपाइले रोग विरुद्धको औषधि ६ वर्षसम्म लगातार खाएमा यो रोग नलाग्ने चिकित्सकहरु बताउँछन्। सरकारले सन् २००३ देखि यस रोग विरुद्धको औषधि वितरण गर्न सुरु गरेको हो । सरकारले हात्तीपाइले रोग सन् २०२० सम्ममा एक प्रतिशतमा झार्ने लक्ष्य लिएको छ। हात्तीपाइले रोगको जोखिममा रहेका देशहरुबाट हात्तीपाइले रोग निवारण गर्ने संयुक्त राष्ट्रसंघको प्रस्तावअनुसार नेपालले पनि सन् २०२० सम्ममा नेपालबाट हात्तीपाइले रोग निवारण गर्ने प्रतिवद्धता जनाएको छ ।

‘क्युलेक्स’ नामक लामखुट्टेको टोकाइबाट सर्ने हात्तीपाइले रोगबाट हाल ३० हजार मानिस प्रभावित रहेको महाशाखाले जनाएको छ । इपिडिमियोलोजी तथा रोग नियन्त्रण महाशाखा प्रमुख डा. विवेककुमार लालले औषधि सेवन गरेका ४८ जिल्लाका मानिसमा हात्तीपाइले रोगको समस्या नदेखिएको र वर्षको एकपटकको दरले ६ वर्षसम्म औषधि सेवन गर्दा रोग निवारण गर्न सकिने दावी गरे ।

गर्भवती, सुत्केरी तथा दुई वर्ष कम उमेरका बालबालिकाले, कुपोषण भएका ५ वर्षमुनिका बालबालिकाले भने यो औषधि सेवन गर्नुहुँदैन । यस्तै, क्यान्सर, मुटुरोगीलगायत दीर्घरोगको औषधि सेवन गरेका बिरामीले समेत हात्तीपाइले रोगविरुद्धको औषधि सेवन गर्नुहुँदैन ।