खाद्यान्न तथा तरकारीमा विषादी प्रयोग रोक्न विषादी मापन केन्द्र स्थापना गरिने

चितवन,१२ फागुन । चितवनमा खाद्यान्न तथा तरकारीमा हुने विषादीको मात्रा  मापन गर्नको लागि प्रयोगशाला स्थापना गरिने भएको छ । जिल्ला समन्वय समिति चितवन, सम्पूर्ण नगरपालिकाको पहलमा र नेपाल जनस्वास्थ्य प्रतिष्ठानसँगको सहकार्यमा विषादी मापन प्रयोगशाला स्थापना हुने भएको हो । प्रयोगशाला स्थापनाका लागि प्रदेश नं. ३ र नगरपालिकाले आगामी वर्ष बजेट विनियोजन गरी काम थाल्ने जनाइएको छ ।
यस्तै, चितवन जिल्लामा विषादी न्यूनीकरण अभियानलाई प्रभावकारी बनाउन जिसस, सातवटै नगरपालिकाका कृषि तथा स्वास्थ्य शाखा संयोजक र नेपाल जनस्वास्थ्य प्रतिष्ठानका विषय विज्ञ गरी ९ सदस्यीय ‘टास्क फोर्स’ समेत गठन गरिने जानकारी दिइएको छ ।

उक्त टास्क फोर्सले प्रयोगशाला स्थापनाको प्रक्रिया, विषादी न्यूनीकरण निर्देशिका एवं कार्यक्रम निर्माण गर्नेछ । गतवर्षको एक सर्भेक्षणले चितवन जिल्लामा विषादी प्रयोगको अवस्था भयावह देखाएकाले यसको न्युनिकरणको लागि विषादी मापन केन्द्र स्थापना गर्न कदम चालिएको हो ।