डा. पुकारलाई भारतमा सम्मान

हेल्थ टुडे
मानव अंग प्रत्यारोपण केन्द्र भक्तपुरका कार्यकारी निर्देशक एवं आरोग्य फाउण्डेसनका सदस्य सचिव मिर्गौला प्रत्यारोपणविद् डा. पुकारचन्द्र श्रेष्ठ भारतमा फेलोसिपसहित सम्मानित भएका छन् ।
नेपालमा मिर्गौला प्रत्यारोपणको क्षेत्रमा उल्लेखनिय योगदान गरेको भन्दै एसोसिएसन अफ सर्जन्स अफ इण्डिया, पञ्जाव स्टेट च्याप्टरले डा. श्रेष्ठलाई आफ्नो दोश्रो वार्षिकोत्सवको अवसरमा शनिबार जालन्धरमा आयोजित विशेष कार्यक्रममा फेलोसिपसहित सम्मान गरेको हो । डा.पुकारसंगै श्रीलंकाका एक वरिष्ठ शल्यचिकित्सक र भारतका दुई जना वरिष्ठ चिकित्सकलाई पनि सम्मान गरिएको आरोग्य फाउण्डेसनले विज्ञप्ति मार्फत जानकारी गराएको छ ।
नेपालमा मिर्गौला प्रत्यारोपण सेवालाई सहज बनाएर सर्वसाधारणको पहूचसम्म पुर्याउन डा.पुकारले महत्वपूर्ण भूमिका खेलेका छन् । न्युनतम श्रोत साधनमा समेत उनले आफु कार्यरत केन्द्रलाई एशियाकै व्यस्त मिर्गौला प्रत्यारोपण केन्द्र बनाएका छन् । डा. पुकारले मानव अंग प्रत्यारोपण केन्द्रमा तिन साढे तिन वर्षको अवधिमा तीनसय भन्दा बढीको मिर्गौला प्रत्यारोपण गरिसकेका छन् ।