राजधानीमा फर्मा एक्पो सुरु

हेल्थ टुडे
औषधि उत्पादकहरुको साझा संस्था नेपाल औषधि उत्पादक संघको आयोजनामा शुक्रबारदेखि राजधानीको भृकुटी मण्डपमा फर्मा एक्पो सुरु भएको छ । तिन दिनसम्म चल्ने एक्पोको नेपाल उद्योग वाणिज्य संघका अध्यक्ष पशुपति मुरारकाले उद्घाटन गरेका हुन् ।
मेलामा स्वदेशी र विदेशी गरि १०८ वटा औषधि कम्पनीका स्टल राखिएका छन् । उद्घाटन कार्यक्रममा संघका अध्यक्ष शैकर घिमिरेले नेपाली औषधि उद्योग आत्मनिर्भरताको बाटोमा गइरहेको दाबी गर्दै सरकारले स्वदेशी उद्योगहरुलाई प्रोत्साहन गर्ने वातावरण बनाउनु आवश्यक रहेको बताए । अहिले नेपालमा खपत हुने कुल औषधिको ४५ प्रतिसत औषधि नेपालमै उत्पादन भइरहेको घिमिरेले जानकारी दिए । एक्पोका प्रवक्ता प्रज्ज्वलजंग पाण्डेले पहिलेका वर्षहरु भन्दा यो बर्ष बढी औषधि कम्पनीहरुको सहभागिता रहेको जनाउदै मेलामा करिव ५० हजारले अवलोकन गर्ने अपेक्षा गरेको बताए । नेपाल औषधि व्यवसायी संघका अध्यक्ष मृगेन्द्र मेहर श्रेष्ठले सरकारले फागुन मसान्त भित्र सबै क्लिनिक दर्ता भइसक्नु पर्ने नियमले औषधि पशल भित्र सञ्चालन हुने क्लिनिक दर्तामा समस्या रहेको बताउदै यसका लागि कम्तिमा ६ महिनाको समय दिनु पर्ने माग गरे ।
नेपाल उद्योग परिसंघका अध्यक्ष हरिभक्त शर्माले उद्योगको विकास नभएसम्म नेपाल समृद्व हुन नसक्ने दाबी गर्दै राज्यले गुणस्तरीय औषधि उत्पादन गर्ने उद्योग सञ्चालनका लागि उपयुक्त वातावरण सिर्जना गर्नु पर्ने बताए । संघका पूर्व अध्यक्ष उमेशलाल श्रेष्ठले सरकारले औषधिको मूल्य नियन्त्रण गर्न खोजेकोमा विरोध गर्दै यसले औषधि उद्योगमा समस्या ल्याउने ठोकुवा गरे । औषधि व्यवस्था विभागका महानिर्देशक नारायण ढकालले बजारमा औषधिको मूल्य कुनै बैज्ञानिक नभएकाले सरकारले मूल्य नियन्त्रण गर्न लागेको बताए । उत्पादक र उपभोक्ता भन्दा पनि बिचौलियाले औषधिको मूल्य बढाएर सयौं प्रतिसत नाफा लिइरहेको जानकारी दिदै सरकार औषधि उद्योगको वाधक नरहेको बताए ।
कार्यक्रममा औषधि उद्योगका विकासमा योगदान दिएको भन्दै पन्ना थापा र आशिश भण्डारीलाई सम्मान गरिएको थियो । एक्सोको उद्घाटन स्वास्थ्य मन्त्री गगन थापाले गर्ने भनिएको भए पनि निर्वाचन आचारसंहिताका कारण थापा उद्घाटनका लागि आएनन् ।