निजामती कर्मचारीको उपचारका लागि निजामती अस्पताल, नेपाली सेनाको उपचारका लागि सैनिक अस्पताल, प्रहरीको उपचारका लागि प्रहरी अस्पतालसँगै अब खेलाडीको उपचारका लागि छुट्टै अस्पताल स्थापना हुने भएको छ । राष्ट्रिय खेलकुद परिषद्ले निर्माण गर्न लागेको उक्त खेलकुद अस्पतालको शिलान्यास गरिएको छ । त्रिपुरेश्वरस्थित राखेप हातामा रहेको लनटेनिसको पूर्वाधार रहेको छेउमा अस्पताल निर्माण गर्न लागिएको हो । तीन तलाको अस्पताल इमर्जेन्सीबाहेक १० शैय्याको हुनेछ ।
करिब १४ करोड खर्च हुने अनुमान गरिएको अस्पतालका लागि आर्थिक वर्षमा पनि बजेटको व्यवस्था भइसकेको छ । तीन वर्षमा निर्माण पूरा गर्ने लक्ष्य रहेको छ । निवर्तमान युवा तथा खेलकुद मन्त्री दलजित विके श्रीपाली, राष्ट्रिय खेलकुद परिषद् (राखेप) का उपाध्यक्ष लामा टेन्डी शेर्पा र राखेपका सदस्य सचिव केशवकुमार विष्टले अस्पतालको उक्त अस्पतालको संयुक्त शिलान्यास गरेका हुन ।
गत जेठ २० गते श्रीपालीको अध्यक्षतामा बसेको राखेपको १ सय ८ औं बोर्ड बैठकले खेलकुद अस्पताल निर्माण गर्ने निर्णय गरेको थियो । खेलाडीहरुका लागि छुट्टै अस्पताल नहुदा उनीहरुले साधारण अस्पतालमा विभिन्न समस्या भोग्दै आइरहेका छन् । खेलकुदका बेला हुन सक्ने संभावित जोखिमलाई मध्यनजर गरेर अस्पताल स्थपना गर्न लागिएकोले अस्पतालले खेलाडीहरुको उपचारमा सहजता उपलब्ध हुने छ ।
Leave a Reply