निद्रा लाग्दैन भने यसो गर्नुहोस्  

महिमा चौधरी,

तपाईंलाई निद्रा नलाग्ने समस्या छ ? त्यसो हो भने त्यसको गतिलो औषधि हो, स्नान । स्नानले शरीरमा फुर्ति ल्याउनुका साथै निद्रा पार्न सहयोग गर्दछ । यसका लागि मौसमअनुसार नुहाउने पानी भने फरकफरक हुनुपर्छ । गर्मी मौसममा चिसो पानीले नुहाउनु जाती हुन्छ भने जाडो समयमा तातो पानीले नुहाउनु स्वास्थ्यका लागि राम्रो मानिन्छ । व्यवस्थित जीवनका लागि स्नान नभई नहुने क्रिया हो । तर विविध कारणले धेरै मानिसलाई निद्रा नलाग्ने समस्याले पिरोलेको हुन्छ ।

समयमा निद्रा लाग्न रातिको खाना जति सक्यो छिटो खानुपर्छ । नेपालको अवस्थालाई हेर्ने हो भने साँझ सात बजेसम्म खाना खाइसक्नुपर्छ । रातिको खाना हल्का र सादा खानुपर्छ । स्वास्थ्य जानकारहरूका अनुसार पेट जति हल्का हुन्छ, निद्रा पनि त्यति नै चाँडो लाग्छ । विज्ञहरूका अनुसार रातिको खाना खाने समय र सुत्ने समयबीच तीन घन्टाको दूरी आवश्यक छ । खाना खाएको तीन घन्टापछि सुत्नाले खाना पचिसकेको हुन्छ । यसले गर्दा पाचनक्रियाका अंगहरूले पनि आराम गर्ने मौका पाउँछन् । यो स्वास्थ्यका लागि राम्रो मानिन्छ । भरी पेट खाना खाएमा निद्रा नलाग्न सक्छ । खाना खाने बित्तिकै सुत्यो भने निद्रा लाग्दैन ।

चिकित्सकहरूका अनुसार एक वयस्क र स्वस्थ्य व्यक्तिले कम्तीमा पनि ६ घन्टा सुत्नै पर्छ । निद्रा उमेरअनुसार फरकफरक हुन्छ । बालबालिकाले दिनमा १० घन्टासम्म सुत्नु राम्रो मानिन्छ । बुजु्रकहरूलाई कम निद्रा लाग्छ । उमेर बढ्दै गएपछि निद्रा पनि कम हुँदै जान्छ । यसलाई स्वाभाविक मान्नुपर्छ । निद्राले थाकेको शरीरलाई आराम दिन्छ । निद्रा लागेन भन्दैमा औषधि सेवन गर्नुहुँदैन । निद्रा लाग्ने औषधिले साइड इफेक्ट गर्छ । प्राकृतिक चिकित्सा वा योगाले निद्रा लाग्नमा सहयोग गर्छ । आत्मविश्वास, दृढ इच्छाशक्ति र सकारात्मक सोचले निद्रा लाग्नमा मद्दत गर्दछ ।  सुत्ने समय सकभर एउटै बनाउनु उत्तम हुन्छ । हरेक दिन फरकफरक समयमा सुत्ने बानीले निद्रा लाग्दैन । मनतातो पानी वा दूधमा एक चम्चा मह घोलेर खानाले पनि मीठो निद्रा लगाउँछ ।