हेल्थ टुडे,
काठमाडौं, साउन १८ : राष्ट्रिय बालअधिकार परिषद्ले विद्यालयहरूमा विद्यार्थीको कपाल जबर्जस्ती काट्ने, विभिन्न बहानामा दण्ड दिने तथा अपमानजनक व्यवहार नगर्न सबै विद्यालयलाई आग्रह गरेको छ । परिषद्ले यस्ता गतिविधि बाल अधिकारविपरीत तथा कानुनले निषेध गरेको कार्य भएकाले तत्काल रोक्न अनुरोध गरेको हो ।
सोमबार परिषद्का सूचना अधिकारी रामबहादुर चन्दद्वारा जारी विज्ञप्तिमा विद्यार्थीको कपाल जबर्जस्ती काट्ने, शारीरिक स्वरूप वा मेकअपका आधारमा हेप्ने, घाम वा अन्य प्रतिकूल अवस्थामा उभ्याएर सजाय दिने तथा अन्य कुनै पनि प्रकारका शारीरिक वा मानसिक दण्ड दिने कार्य गैरकानुनी रहेको उल्लेख गरिएको छ ।
परिषद्का अनुसार शिक्षा नियमावलीले कुनै पनि अवस्थामा विद्यार्थीको शारीरिक तथा मनोवैज्ञानिक स्वास्थ्यमा नकारात्मक असर पर्ने गतिविधि गर्न अनुमति दिएको छैन । यस्ता कार्य बालबालिकाको आत्मसम्मान र व्यक्तित्व विकासमा प्रतिकूल असर पार्ने भएकाले विद्यालयहरूले विशेष सतर्कता अपनाउनुपर्ने परिषद्को भनाइ छ ।
विज्ञप्तिमा बाल अधिकार सम्बन्धी संयुक्त राष्ट्रसंघीय महासन्धि तथा बालबालिका सम्बन्धी ऐन, २०७५ ले घर वा विद्यालयमा बालबालिकामाथि शारीरिक वा मानसिक दण्ड दिने तथा अमर्यादित व्यवहार गर्ने कार्यलाई बाल हिंसा र कानुनी कसुरका रूपमा परिभाषित गरेको स्मरण गराइएको छ ।
परिषद्ले पोसाक, साजसज्जा, कपालको शैली वा विद्यालय शुल्क नतिरेको बहानामा विद्यार्थीलाई अपमानित गर्ने, भेदभाव गर्ने वा परीक्षाबाट वञ्चित गराउने जस्ता व्यवहार पनि स्वीकार्य नभएको स्पष्ट पारेको छ ।
यस्ता गैरकानुनी कार्य गर्ने व्यक्तिलाई प्रचलित कानुनअनुसार ५० हजार रुपैयाँसम्म जरिवाना वा एक वर्षसम्म कैद, वा दुवै सजाय हुन सक्ने व्यवस्था रहेको परिषद्ले जनाएको छ । बालबालिकाको आत्मसम्मान, मर्यादा र मानसिक स्वास्थ्यको संरक्षण गर्दै बाल अधिकारको सम्मान, संरक्षण र प्रवद्र्धन गर्न सबै विद्यालय प्रशासन तथा विद्यालय व्यवस्थापन समितिलाई बालमैत्री आचारसंहिता निर्माण गरी प्रभावकारी रूपमा कार्यान्वयन गर्न पनि परिषद्ले अनुरोध गरेको छ ।
Leave a Reply