हेल्थ टुडे,
काठमाडौं, २९ माघ : सर्वोच्च अदालतको अन्तरिम आदेशपछि स्वास्थ्य सेवा विभागको महानिर्देशकमा पुनर्वहाली भएका डा. राजेन्द्र पन्तलाई कुनै पनि हालतमा पुनर्वहाली नगर्ने स्वास्थ्य सचिव डा. पुष्पा चौधरीले योजना बिफल भएको छ । अदालतको आदेशपछि स्वास्थ्य मन्त्री दीपक बोहोराको निर्देशनमा मन्त्रालयको प्रशासन साखाले तयार पारेको डा.पन्तको पुनर्वहाली पत्र डा. पुष्पाले लुकाउन लगाउन लगाएकी थिइन । शुक्रबार तयार भएको पत्र आईतबार मन्त्रालय पुग्दा पत्र सहितका प्रशासन साखाका अधिकृत गायव भएपछि डा. पन्तले सोमबार अदालतको आदेशको अवहेलना गरेको भन्दै मन्त्री बाहोरा र सचिव डा. चौधरीलाई प्रतिवादी बनाएर फेरि अदालत जाने तयारी गरेपछि बल्ल उनलाई सोमबार विभागको महानिर्देशकमा पुनर्वहाली भएको पत्र दिइएको छ । गत पुष ३० गते डा. पुष्पाकै मिलेमतोमा स्वास्थ्य मन्त्री बोहोराले स्वास्थ्य सेवा विभागका महानिर्देशक डा. पन्तलाई मन्त्रालय सरुवा गरेर पश्चिमाञ्चल क्षेत्रिय अस्पतालमा कार्यरत डा. तारानाथ पौडेललाई विभागको निमित्त महानिर्देशक नियुक्त गरेका थिए ।
सफाईको मौका समेत नदिई, विना कारण कानून विपरित आफूलाई हटाइएको भन्दै डा. पन्त पुनर्वहालीको माग सहित माघ १७ गते सर्बोच्च गएका थिए । सर्वोच्चले माघ १९ गते मन्त्रीको निर्णय कार्यन्वयन नगर्न अन्तरिम आदेश दिएको थियो । सर्वोच्चले आदेश दिएको १० दिनसम्म पनि डा. चौधरीकै योजना अनुसार डा. पन्तलाई पत्र दिइएको थिएन । कार्यक्षमता कमजोर पाएपछि पूर्व स्वास्थ्य मन्त्री गगन थापाले गत असारमा स्वास्थ्य सेवा विभागकी तत्कालिन निमित्त महानिर्देशक डा. चौधरीलाई मन्त्रालय सरुवा गरेर डा. पन्तलाई महानिर्देशक नियुक्त गरेका थिए । त्यो बेलाको बदला लिन डा. चौधरीले डा. पन्तलाई महानिर्देशकबाट हटाउने खेल खेलेको मन्त्रालयका एक अधिकारीले बताए । ‘आइतबारसम्म पत्र नपाएपछि डा. पन्त सोमबार अदालतको अवहेलना गरेको भन्दै फेरि अदालत जाने तरखरमा थिए । यही कुरा थाहा पाएपछि सोमबार डा. पन्तलाई पुनर्वहालीको पत्र दिइएको हो, मन्त्रालय स्रोतले बताएको छ ।
डा. पन्तले पत्र बुझिसकेको र आजै दिउसो महानिर्देशकको पद बहाली गर्ने बताए । डा. पौडेललाई पहिलेकै स्थान पश्चिमाञ्चल क्षेत्रिय अस्पताल फिर्ता पठाइएको छ । डा. पन्तको पुनर्वहालीले मन्त्रीले जे गर्दा पनि हुन्छ भन्ने मनामानी माथि अंकुश लगाएको र यो घटना अवका मन्त्रीहरुका लागि पनि गतिलो पाठ भएको स्वास्थ्य विज्ञहरु बताउछन् ।
Leave a Reply