४९ स्वास्थ्य संस्था स्थानीय तहलाई हस्तान्तरण

हेल्थ टुडे,
झापा, १४ वैशाखः जिल्ला जनस्वास्थ्य कार्यालय झापाले जिल्लाका १५ वटै स्थानीय तहमा रहेका ४९ वटा स्वास्थ्य संस्था स्थानीय तहलाई हस्तान्तरण गरेको छ ।
जिल्ला जनस्वास्थ्य कार्यालय मातहतका सम्पूर्ण स्वास्थ्य संस्था स्थानीय तहलाई हस्तान्तरण गरिएको जिल्ला जनस्वास्थ्य कार्यालय झापाका वरिष्ठ जनस्वास्थ्य प्रमुख मधुसूदन कोइरालाले जानकारी दिनुभयो ।
उहाँका अनुसार तलब–भत्ता, औषधि खरिद, जनस्वास्थ्य कार्यालयले सञ्चालन गर्दै आएका कार्यक्रम स्थानीय तहबाट सञ्चालन हुनेछ ।
जनस्वास्थ्य सम्बन्धी क्रियाकलाप स्थानीय तहबाटै हुने बताउनुहुदै जनस्वास्थ्य प्रमुख कोइरालाले केन्द्रीय कार्यक्रम मात्र अब जनस्वास्थ्यले गर्ने जानकारी गराउनुभयो ।
जनसंख्या तथा स्वास्थ्य मन्त्रालयले सातवटै प्रदेशमा संघीय स्वास्थ्य कार्यालय राख्ने नयाँ प्रस्ताव गरेको हो ।
सतहत्तरवटा जिल्लामा संघीय स्वास्थ्य इकाइ राख्ने र केन्द्र, प्रदेश र स्थानीय तहमा समन्वय गरेर अत्यावश्यक काममा बाधा नहुने गरी कुनै क्रियाकलाप नगर्न प्रस्ताव गरेको जनस्वास्थ्य प्रमुख कोइरालाले जानकारी दिनुभयो ।
रासस