स्वास्थ्यमा संघिय संरचना अनुसार प्रमुखहरुको जिम्मेवारी तोकियो

हेल्थ टुडे,

काठमाडौं, २ साउन : स्वास्थ्य तथा जनसंख्या मन्त्रालयले संघिय संरचना अनुसार पहिलो पटक मन्त्रालय मातहतका प्रमुखहरुको जिम्मेवारी तोकेको छ । स्वास्थ्य तथा जनसंख्या मन्त्री उपेन्द्र यादवको निर्णय अनुसार जिम्मेवारी तोकिएको हो । संघिय संरचना अनुसार जिम्मेवारी तोक्दा अधिकांश पुरानै निर्देशकहरुले नयाँ जिम्मेवारी पाएका छन् भने केही निर्देशकलाई जिम्मेवारीविहीन बनाएर मन्त्रालय सरुवा गरिएको छ । मन्त्रालयका प्रमुख विशेषज्ञ डा. शुशिलनाथ प्याकुरेलाई जनसंख्या व्यवस्थापनको जिम्मा दिइएको छ भने स्वास्थ्य सेवा विभाग, औषधि व्यवस्था विभाग र आयुर्वेद बिभागका वर्तमान महानिर्देशकहरुलाई यथास्थानमा जिम्मेवारी दिइएको छ ।

क्षयरोग नियन्त्रण केन्द्रका निर्देशक डा. राजेन्द्र पन्त, आपूर्ति महासाखाका निर्देशक डा. रमेश खरेल, डा. अनुज भट्टचन र डा. यदुचन्द्र घिमिरेलाई मन्त्रालय सरुवा गरेर जिम्मेवारीविहिन बनाइएको छ । समाजिक विकास मन्त्रालय मातहत सात वटै प्रदेशमा स्वास्थ्य निर्देशकहरुलाई पनि जिम्मेवारी दिइएको छ । मन्त्रालयको नीति, योजनाका प्रमुख महेन्द्र श्रेष्ठलाई ३ नम्बर प्रदेशको स्वास्थ्य प्रमुख बनाइएको छ भने पुनर्जागरण महासाखाका भोगेन्द्र डोटेललाई १ नम्बर प्रदेशको स्वास्थ्य निर्देशक बनाएको छ । बैतडीको जनस्वास्थ्य प्रमुख डा. गुणराज अवस्थीलाई ७ नम्बर प्रदेशको स्वास्थ्य निर्देशक बनाइएको छ भने रिता भण्डारीलाई कर्णाली प्रदेश प्रमुख र डा. तारा पौडेललाई पोखरा प्रदेशको स्वास्थ्य निर्देशक बनाइएको छ ।