चिकित्सा विधेयक माथिको संशोधनमा छलफल हुने

विष्णु नेपाल
काठमाडौँ, २९ साउनः बहुचर्चित एवं वहुप्रतिक्षित राष्ट्रिय चिकित्सा शिक्षा विधेयक २०७५ र विधेयकको संशोधन माथि साउन ३१ गतेबाट दफावार छलफल शुरु हुने भएको छ । प्रतिनिधिसभा, शिक्षा तथा स्वास्थ्य समितिको सोमबार बसेको दोस्रो बैठकले सो विधेयक र विधेयकमाथि भएका २२ वटा संशोधनका दफादफामा सो दिनबाट छलफल चलाउने निर्णय गरेको हो ।
प्रतिनिधि सभाको यही साउन १३ गतेको बैठकमा सो विधेयकमाथि सामान्य छलफल सम्पन्न भई समितिमा पठाउने सर्वसम्मत निर्णय भएको थियो । शिक्षा, विज्ञान तथा प्रविधिमन्त्री गिरिराजमणि पोखरेलले प्रस्तुत गर्नुभएको सो विधेयकमाथि साउन १६ गते दिनको २ः०० बजेसम्म सांसदलाई संशोधनको समयसीमा निर्धारण गरिएको थियो ।
सरकार र प्रा डा गोविन्द केसीका बीचमा यही साउन १० गते भएको नौबुँदे सहमतिका बुँदाअनुसार नै सो विधेयकमाथि एकल तथा संयुक्त गरी २२ वटा संशोधन दर्ता भएको थियो । समितिका ज्येष्ठ सदस्य मानबहादुर विश्वकर्माको अध्यक्षतामा बसेको समितिको बैठकले साउन ३१ गते बस्ने बैठकमा शिक्षामन्त्री पोखरेल तथा संशोधनकर्ताले आ–आफ्ना भनाई राख्नु हुनेछ ।
बैठकले चिकित्सा शिक्षा विधेयक, संशोधनका बुँदा तथा यसअघि जारी भएको अध्यादेशलगायतका सामग्री समितिका सदस्यलाई उपलब्ध गराउन सचिवालयलाई निर्देशन समेत गरेको छ । बैठकले समितिको क्षेत्राधिकारभित्र रहेका शिक्षा, विज्ञान तथा प्रविधि, युवा तथा खेलकूद एवं स्वास्थ्य तथा जनसङ्ख्या मन्त्रालय अन्तर्गतका साङ्गठनिक संरचना, मन्त्रालय अन्तर्गतका ऐन, नियम तथा ती मन्त्रालय अन्तर्गत काम गर्ने राष्ट्रिय तथा अन्तर्रा्ष्ट्रिय गैरसरकारी संस्थाका गतिविधिका बारेमा पनि जानकारी लिने निर्णय गरेको छ ।
समितिको बैठकमा समितिका सदस्य खगराज अधिकारी, उमेश श्रेष्ठ, योगेश भट्टराई, जीवनराम श्रेष्ठ र चित्रलेखा यादवले सम्बन्धित मन्त्रीबाट समितिलाई मन्त्रालयगत जानकारी गराउन माग गर्नुभयो ।
रासस